Himachal Pradesh mipuite chuan an sorkar thar tur thlangin November 12 hian vote an thlak dawn a, December 8-ah chhiar a ni ang.
Election Commission chuan Zirtawpni khan inthlan tur hi a puang a, hetih rual hian kumin kum tawpa inthlan ngai ve bawk, Gujarat erawh a hun tur a la sawi ve lo thung.
Chief Election Commissioner Rajiv Kumar chuan chhan hrang hrang avangin Gujarat inthlan hun hi la puan ve theih a nih loh thu a sawi a. Heng zingah hian inrawn khawm ngai a la awm thu te, state pahnihte assembly term kal mek tawp hun kar hlat dan te, sik leh sa te pawh ngaihtuah tel a ngaih thu a sawi.
Himachal Pradesh assembly-ah hian MLA 68 an awm thei a, sorkarna siam turin thlawptu 35 neih a ngai a. Term kal mek hi January 8-a tawp tur a ni.
Gujarat assembly term hi February 18-a tawp tur a ni ve thung a. Tih dan tlangpuiah chuan thla ruk huam chhunga term tawp tur state-te hi chu a ruala inthlan emaw, a puan hun inang emaw a ni thin.
“State pahnih term tawp inkarah ni 40 a awm a. Dan inzamah chuan pakhat result chhuah hun nena innang buai lo turin a tlem berah ni 30 tal a tla tur a ni tih a ni,” tiin Kumar chuan a sawi a, dan bawhchhiatna an neih loh thu a sawi.
“Chhan hrang hrang a awm a, sik leh sa awm dante pawh. Himachal inthlan hi vur a tlak hma ngeia tihfel kan duh a ni,” tiin a sawi a, commission chuan a hun chungchangah hian mi dang (stakeholder) tam tak a rawn kual tih a sawi.
Tun tum hi state pahnihte a hun rual lova an inthlan vawi hnihna chauh a la ni dawn a ni.
Inthlan hnuhnung ber, kum 2017 khan a hun hrana buatsaih tawh niin Election Commission chuan sawiselna a tawn phah nasa hle a, eptute phei Prime Minister Narendra Modi-a’n inthlan hun tep thlenga an state (Gujarat) a tlawh theih nan a nih thu an sawi nghe nghe.
Hetih laia Chief Election Commissioner AK Joti chuan an puhna hi a pha viau thung a, Model Code of Conduct-in rei tak a phuar thei bik lo niin a sawi a, ruah leh tui lian an tawrh bawk avangin khuahkhirhna hnuaia awm reng thei an ni lo niin a sawi a ni.
Tun tumah hian inthlan puan avanga Model Code of Conduct-in sorkar a phuar chhung hi tihtawi a ni a, a hmaa ni 70 ni thin chu ni 57 a ni tawh dawn.