Aizawl: Rural Development Minister Lalruatkima’n nimin khan Sateek-ah Wholesale Market-cum-Guest House leh Aibawk-ah Rurban Cluster training centre-cum-BDO’s office a hawng.
Sateek Wholesale Market-cum-Guest House chu Shyama Prasad Mukherji Rurban Mission (SPMRM) hnuaiah Rs. nuai 350 senga sak a ni a. Thla 18 chhunga sak zawh tura ruahman niin, Mizoram Technocrats Company, Tuikhuahtlang, Aizawl-in thla 16 (January 4, 2021 – April 28, 2022) chhungin an sa zo a ni.
Aibawk Rurban Cluster Training Centre-cum-BDO’s office chu phase hniha sak niin, phase khatna a chhawng hnuai, BDO Office chu MGNREGS (MC) leh MzSRLM convergence-a sak niin, Rs. nuai 23.5 (MGNREGS Rs. 18,50,000 leh MzSRM Rs. nuai 5) hmanga sak a ni a. July, 2020-ah hna tanin March, 2021-ah sak zawh a ni a. Phase hnihna, a chhawng chung zawk, Rurban Cluster Training Centre pawh Shyama Prasad Mukherji Rurban Mission (SPMRM) leh MGNREGS convergence-a sak a ni a. Rs. 30,66,000 (SPMRM Rs. 25,66,000 leh MGNREGS Rs. 5,00,000) sengin October, 2021 – March, 2022 chhunga sak a ni.
RD minister chuan SPMRM chu kum 2016-ah Aibawk cluster-ah tan a nih thu sawiin, tlangramah chuan cluster khatah mihring 5,000-15,000 inkar an awm a ngaih avangin Aibawk RD Block-a khua zawng zawng tuam theih a nih loh thu leh khaw pakua tuam a nih thu a sawi a. “Kan thawh that avangin cluster dang pathum (Khawzawl, Thingsulthliah leh East Lungdar) min pek belh hial a, cluster pali kan nei tawh a, tunah hian thingtlang khuaten khawpui anga hmasawnna ruhrel an neih ve theih nan kan theih chinah tluang takin kan thawk mek zel a ni,” a ti.
State Performance indicator-ah Mizoram chu India ram pumah 3-na a nih thu leh cluster based performance indicator-ah Aibawk cluster chu India ramah 1-na a nih thu minister chuan a sawi a. “Cluster dang siam belh zel tura kan inruahman laiin sorkar laipuiin he scheme hi a titawp dawn tih thuthang kan hria a, theihtawpin kan bawhzui a, Union minister bakah prime minister thlengin DO letter-in kan umzui a, thu thar kan hriat hnaih berah chuan finance ministry kutah a awm tih a ni a, chhunzawm a nih ngei theih nan theihtawp kan chhuah reng,” a ti bawk.
Ni 100 inhlawhna MGNREGS-ah pawh tun hnai kum thum chhung kum tin ni 100 inhlawhna an siam theih thu RD minister chuan sawiin, kuminah pawh ni 100 inhlawh pha ngei tura theihtawp an chhuah thu a sawi bawk a ni.