Aizawl : Ministry of tribal affairs-in tribal scholarship tur Rs. nuai 3,590.31 a pekchhuah tawh chu Mizoram sorkara Finance Dept.-in tun thlengin Mizoram Scholarship board hnenah a la pe lo niin ZPM thalaiin an sawi a, hriatthiam har an tih thu an sawi.
ZPM thalai chuan scholarship sum hi ministry of tribal affairs-in tun thla ni 4 khan release tawh mahse, tun thlengin zirlaite hnen a la thleng lo niin an sawi a. “MNF sorkârin zirlaite a hmuhsitnaah kan ngai” an ti.
Congress hunlai aṭanga tun thlengin scholarship chungchangah zirlai ten harsatna an tawk fo tih ZPM thalai chuan sawiin, pawi an tih thu an sawi a. “Zirlaite chanvo pe tura nawr kal chawp ngai sorkar Mizoramah kan nei ṭhin hi a vanduaithlâk kan ti” an ti bawk.
ZPM thalai chuan “Zirlaite hmakhua leh an chanvote politics khelhna leh infiamna atana hmang lova, scholarship sum chu a bo a bâng awm lova zirlaite account-a thun thuai turin sorkar kan phut” an ti bawk a ni.