Premier League football club Wolverhampton Wanderers chuan an manager hlui Nuno Espirito Santo chu Molineux a kir leh turin inbiakna an neihpui.
Wolves hian manager thar ni tur ngawrh takin an dap mek a. Spanish coach Julen Lopetegui chu beisei mahse an sawmna a hnawl hnuah coach dang an melh kual.
Portuguese coach Nuno hi season hautak tak a hman hnuah kum 2021 khan club in an ban a. A zawna pasarihna an nih hnuah a tawp khar danin club hotute mit a tlung lo.
Mahse a hnathawh avangin Wolves tantute ngainat a la hlawh hle a. Tottenham enkawl hman mahse a hlawhtling lova, November thla khan kum 48 mi Spurs in an ban.
Wolves a enkawl hian Championship-ah an awm a, a season hmasa berah Premier League a kaipui.
Hei chauh hi ni lovin Europa League-ah quarter-final a hruai thleng bawk a. Kum 39 hnuah a club hi a vawikhatna atan Europe huap inelnaah a telpui thei.
Wolves hian tun thla tir khan amah thlaktu Bruno Lage chu an ban a, tunah hian Nuno hi Saudi Arabian club Al-Ittihad-ah kum hnih contract neiin a awm mek.