Eygpt (Aigupta) sorkar hnuaia inziaklut musicians’ union chuan electro-beat larpui tak, ‘mahraganat’ zaithiamte chu mipuiia an inlan a khap lailawk.
Ramchhunga vung taka kal mek electro-beat genre hi ‘electro-shabbi’ tia hriatlar a ni tel bawk a, computer hmanga chei bawl, beat te pawh tang at at mai a nih vangin tunlai hian hmun hrang hrangah ram zauhin thalaite lawm hlawh tak a ni chho mek.
Arab khawvela an music kalphung pawlh dan thei leh tibawrhbang theia ngai an tam chhoh mek vang te, an hla thu rum leh tumbik nei fak fak avangtea thuneitute mit leh beng tikham angreng tak a nihna te bakah, hmangaihna, thuneihna leh sum leh pai chungchanga mihring nunphung leh nihphung pel ruak ruaka an chham uchuak chiam nia sawi a nih bawk vangin culture thlitfim lehzual nan leh a tha lo lam zawnga nghawng a neih hlauhthawnna vangin Aigupta-a thuneitute chuan he genre darh chak tak hi hun eng emaw chen chu khap bur lailawk an tum ta a ni.
Union lam chuan mahraganat singer te hi tun dinhmunah an zai leh inlan an phalsak tawh rih lova, an chungchang hi uluk taka zirchian a, ngaihtuah ho a nih hnu ah hmalak zel dan tur ngaihtuah an tum a. Egypt artistic hlutna leh zahawmna vawnhim ngei ngaia an hriat avangin heti ang hian thutlukna khauh leh rum angreng tak an siam ta a ni ber.
Heti anga khap burna an kalpui laklawkna tura hmalatu ber chu tunhnaia union hotupa ni ta Egyptian singer Mustafa Kamel nia sawi a ni a. Union hruaitu hlui Hani Shaker-a’n February 2020 khan electro-beat hi genre pawm theih loh hul hul a ni, tiin club, cafe, hotel leh concert-na hmunah te mahraganat zaithiamte hi an inlan thei lovang, tiin campaign liantham angreng tak kalpuiin khap tumin thahpui a lo thawh tawh a. Tunah hian amah thlaktu thar pawh hian a hmaa aia nasa zawka chet la in, hun eng emaw chen chu an zai leh inlan khap burna thupek a chhuah.