Real Madrid leh France forward Karim Benzema chuan European football a chawimawina dahsan zing ami Ballon d’Or chu a vawikhatna atan a dawng.
Season liamta hmang tha tak Benzema hi France Football magazine chuan season liamta chhunga footballer tha ber chawimawina hi an hlan a. Kum 2021-22 chhung khan game 46 atang goal 44 a khung a, Real Madrid in UEFA Champions League leh La Liga an chawina kawnga player malkhai a thawhhlawk ber a chhiar ngam a ni.
Season liamta a Liverpool tana khel Bayern Munich forward Sadio Mane leh Manchester City star Kevin de Bruyne te khum a chawimawina dawngtu Benzema hian he chawimawina hi a vawikhatna atan a dawng.
Ballon d’Or chawimawina hi Lionel Messi leh Cristiano Ronaldo ten an thunun hle thin a. An sem hnuhnun 13 atangin vawi 12 an la a. Mahse tun tumah vawi sarih dawng tawh Lionel Messi a lang pha lova. Vawi nga dawng tawh Cristiano Ronaldo chu 20-na a ni pha chauh.
Benzema hun a thleng
Real Madrid tan goal a khung hnem mai a ni lova, an team in hlawhtlinna tam tak an neihna kawnga hmahruaitu a ni thin. Goal pawimawh a khung fova, goal a khung loh pawhin team tana danglamna siamtu a ni fo thin.
Hengte avang hian Benzema hi chawimawina dawng tura rinkai chiang takin a ni sa.
Kum 1998 a Zinedine Zidane-a’n he chawimawina hi a dawn hnua French player zinga dawng leh thei hmasa ber a ni.
“Naupang ka nihin ka suangtuahna mai a ni a. Mahse beidawn lohna nen ka kal zel a, theih loh tak tak hi a lo awm lo. He chawimawina avang hian ka lawm a, ka thlen chin hi ka chhuang ve hle.” tiin lawmthu a sawi.
Chawimawina dang
Hmeichhe chawimawina lamah Barcelona leh Spain innghahna Alexia Putellas chuan a kum zawnin chawimawina a dawng nawn a. Women’s Euro 2022 inhliam avangin khel thei lo mahse club tana a chetthat em avangin dawng tura rin hlawh ber a ni ta tho.
Premier League champions Manchester City chu Club of the Year a thlan an ni bawk.
Chawimawina dawngtute:
Ballon d’Or : Karim Benzema (France & Real Madrid)
Ballon d’Or Féminin : Alexia Putellas (Spain & FC Barcelona)
Kopa Trophy : Gavi (Spain & FC Barcelona)
Yashin Trophy : Thibaut Courtois (Belgium& Real Madrid)
Gerd Müller Trophy : Robert Lewandowski (Poland & Bayern Munich/FC Barcelona