Aizawl West I MNF Block Political Training nimina buatsaih hmanpuitu MNF Adviser Lalruatkima chuan mumal taka MNF an kal laiin eptu party-te an chiri hle tih a sawi a. Nakkum MLA inthlanpuiah MNF an sorkar leh ngei a rin thu a sawi bawk.
Sihhmuia Holiday Palace-a hun hmanah Lalruatkima hian, “Kum 2023 inthlanpuiah Pathian leh mipui zarah MNF kan sorkar leh ngei ka ring a. Pu Zoramthanga Chief Minister, ram vei mi, vision nei tha, a taka thawk thin kan nei a. Mumal taka MNF kan kal laiin opposition party-te an chiri hle,” a ti.
Eptu party pahnih, Congress leh ZPM chungchang sawiin Lalruatkima hian, “Congress party-te India ram hmun ril lamah awmzia an awm tawh lo a, Mizoramah lah nise hmanni maia mipuite hnawl hnu kha an ni. Congress hi mipuiten tute nge an nih kan hria a, sorkar turin mipui rin an la hlawh lo tih a chiang,” a ti a. “ZPM lah nise, an party kalphung pawh a mumal lo hle a. An president Pu Lalliansawta’n, ‘Kan sorkar chuan Pu Lalduhoma a CM ang,’ a ti a. Amah Pu Duhoma ve thung chuan, ‘Kan sorkar chuan CM tur chu Val Upa Council-in a rel ang,’ a ti lawi a. An thu leh an chezia leh ui bengah hlin tur a awm lo,” a ti bawk.
Lalruatkima hian an sorkar hun chhunga mipui tana an hnathawh hrang hrang sawiin, “Congress sorkar laiin zu zawrh avangin Zoram mipui kan rum thin a, tunah chuan a lo reh ta a. Tlaivara gas chân a bo a, hnianghnar takin gas kan nei ta a. Kawng hrang hranga mipuite ni tin mamawh kan lo hnianghnar ta viau a ni. ‘Ei ruk do nan Lok Ayukta kan din ang,’ kan ti a, kan din a. Zirtirtu ringawt pawh 3,000 chuang kan la tawh a ni. MNF hian thalai lehkha thiam tan sorkar hna a siam hnem ta hle. Lifetime vehicle tax mipui tana phurrit pawh zangkhai zawkin mipui tan siam rem a ni ta bawk a ni,” tiin a sawi.
Zoramin hun harsa leh manganna a tawh laia lungthu pathum – sorkar, kohhran leh tlawmngai pawl an tanrual avangin chhuanchham an awm lo chu lawmawm a tih thu a sawi a. Pathianin he ram tana malsawmna a pek MNF sorkarah hian a hmu tam hle tih sawiin, term lehah hian MNF a sorkar leh ngei a rin thu leh, MNF sorkar kaltlangin Pathianin Zoram hi nasa zawkin malsawmna a vur a rin thu a sawi bawk.
He hun hi H Pachhunga, Aizawl West I MNF Block president-in a kaihruai a. Bialtu MLA Zothantluanga pawhin thu a sawi a ni.