Aizawl: ZPM Working President K Sapdanga chuan ZPM pian chhan chu mi hausaten pawisa khelhna ang chauha ngaia politics an khel tur chu duh loa kalkawm an ni tih a sawi a. An party tobul chu an hriatchian a ngai niin a sawi.
Reiek Community Hall-a ZPM Dampa East Block political training nimina a hmanpuinaah K Sapdanga hian tun hnaia tawngkam lai tak, thluaka sum lut tih hi kohhran huang atanga an hriat, awmze thui tak nei ni mah se sawi chhunzawm pawh tul a tih loh thu a sawi a. Sawi chhunzawm tul a tih erawh chu mipuite thluakah sum a lut ve ang tih hlauhawm thu a sawi.
“Inthlan hun atana candidate kan mitthla danah a ipte puar thei deuh intinzawnna a awm thei em tih ngaihtuah a ngai. Chutianga kan kal a nih chuan he ram hian MLA atan ram veitu leh ram kaihhruai dan hria ni loin, mi hausa kan zawng ang. Chutianga thluaka sum lut vei ve lo turin tlang hrang hranga mipuite kan inngen nawn mawlh mawlh reng a ni,” K Sapdanga’n a ti.
ZPM party-a tel ve loin sorkar tihnawktu tur anga VUC an sawi thin chu an party nihphung leh inkaihhruaina dante an hriat chian loh vang tih sawiin K Sapdanga hian, “VUC hi ZPM danah chuan party leh sorkar khalhtu, vengtu, humhalhtu a ni,” a ti a; sorkarin dan awm sate a zawm dik em tih enpuitu tur an nih thu leh an khirh hle dawn niin a sawi a. Sorkarin Kamrul-a te ang lo khawi ve ta se, VUC chuan a phal loh tawp tur thu leh, bill theh luh nia cheque la thei contractor, thawk chhe em em si awm theite hi VUC hian a remtih ngai loh tur thu a sawi.
ZPM working president chuan ei ruk intanna chu politics atangin a ni tih a chian thu sawiin, “Sorkar hnathawk tu emaw chu a lo dik lo mai thei; mahse, politics hi a bul ber a ni,” a ti a. Sorkar hnathawk, dik taka thawkte leh kohhran rawngbawltute huaisen tak takte hian ram vei an tinain, inthlan an nghahhlelh tawh avangin inthlan leh hi chu ZPM hun a ni ve tawh ang tih hi an sawi hmasak a ngai lo a, Zoram hmun tinah mipuiin an sawi huai huai tawh tih a sawi bawk.