Aizawl: Sorkar laipuia Information & Broadcasting ministry hnuaia Central Bureau of Communication (CBC) Field office, Aizawla hotuten an sawmna chhangin nimin khan MJA Gen. Hqrs hruaitute leh member thenkhatten Zonuam Veng, Aizawla CBC Field office an tlawh a, CBC Field office hotute chuan thawhhona tha neih an duh thu an lo hrilh.
CBC Field Publicity Assistant (in-charge CBC, Aizawl) Lalginlen Lhouvum-in CBC hmalakna leh hnathawh dan tlangpuite MJA hruaitute leh member-te chu lo hrilhin, anni nena thawhhona tha tak neih an duh thu a lo hrilh a ni.
Lhouvum chuan Ministry of Information & Broadcasting hnuaia peng pathum – Field Publicity, DAVP leh Songs & Drama te chhûngkhawma Central Bureau of Communication tih a nih thu sawiin, CBC Field office, Aizawlah thawktu pali an awm mek thu a sawi bawk.
MJA President C Lalrambuatsaiha pawhin CBC hotute chu MJA-in theihtawpa thawhpui an inhuam thu hrilhin, Mizorama chanchinbumite ngheng hnai tur leh thawhpui thiam tur leh press release an neihte chu journalist-te hnena pe taima turin a chah a. MJA chanchin tlangpui a sawi bawk.
CBC Field office-a hotute leh MJA lam aiawhte hian thu thehdarh kawnga thawhho dan tur hrang hrang te an sawiho a ni.