ZPM party PAC member, TBC Lalvenchhunga’n MNF sorkarah smuggler an zalen a, dikna a chep tawlh tawlh nia a lan thu sawiin, Assam Police-in kum khat chuang an veh hnua an man, smuggler tam tak hotupa, Musa Ahmed Siddiqui-a’n Aizawl West I biala Sairang III-ah vote a nei niin a sawi a, a serial number 448, voter ID No GDP 0094425 a nih thu a sawi.
TBC Lalvenchhunga chuan nimin khan Aizawl Press Club-ah thuthar thehdarhtute kawmin heng thu hi a sawi a. “Sual zalenna ram, smuggler-te paradis-ah kan ram a chang a ni ta ber mai a, heta mawhphurtu chu sorkar a ni,” a ti.
Inrinni khan Zoram mipuiin a hming an hriat tlar tak, Abub Majumdar-a boss nia sawi, smuggler zinga a hotupa ber leh meizang hlaptu, Musa Ahmed Siddiqui, Nilambazar, Karimganj district mi nia sawi chu Assam Police-in kum khat chuang an veh hnuah Silchar Airport-a an man thu chanchin tharah a lang tih TBC Lalvenchhunga chuan a sawi a. Siddiqui (Amosa tia sawi bawk) chu kumin kumtir khan Mizoram ruling MLA pakhat nen an inhnimhnaih thu TV kaltlangin Ruatfela Nu pawhin a lo sawi tawh niin a sawi.
TBC Lalvenchhunga chuan Siddiqui chu Abub Majumdar aia thleng sang a nih thu leh minister challang tak fanu nen pawh an inhnimhnai hle nia sawi a nih leh zel thu a sawi bawk.
ZPM Leader Lalduhoma’n assembly house-ah ngei Abub Mazumdar-a pawh Raj Bhavan-a sorkar thar lakluhna leh CM Bangla-a sorkar thar lawmnaah te a tel thu leh a nupui neihnaah CM nupui a tel thu te a sawi tawh tih TBC Lalvenchhunga chuan a sawi.
“Abub Majumdar hi ramri buai chungchanga state pahnih CM-te inbiaknaah official delegation zingah a thu ve tawh bawk a. MNF thuchhuahah (Memo No. MNF/Media/03/2022/366 Dt.07.02.2022) chuan Mizoram House-a thlen a tum thu te pawh kan lo hmu a nih kha,” TBC Lalvenchhunga chuan a ti a. Tun hnai maiah man a nih thu leh bail-a a chhuak chu FCS&CA minister ina chaw a ei lai hmuh a nih leh thu leh sorkar official function, District Fast Track Court lungphumna, Kolasib-a neihah pawh a tel thu sawiin, “Kan sorkarah hian smuggler-te an zalenzia a lang chiang hle a ni,” a ti.
TBC Lalvenchhunga chuan, “Chief minister-in Anthurium Festival-a a thusawinaah Zoram malsawmnate haichhuah a nih theihna atana tawiawm turin mipuite thawhpuiah min sawm mek laiin, hengho hi an thawhpui tlat nia a lan avang leh an hum tlat nia a lan avang hian tunah chuan thiltitheiah an thuttir tawh a ni ber,” a ti.
“Hemi chungchang hi keini pawhin zawhna kan zawt fo tawh a, vawiin thleng hian chhanna kan la hmu lo. Mipuite hmaah sawifiah turin kan phut nawn leh a ni,” a ti a. “Heng smuggler Mizoram tihmingchhetute leh kan thalai duhawm tak takte nunna tam tak min laksaktute chhui kawngah hian kan tuanfum hle niin a lang a. Kan police tha tak takte kut hi phuarin a awm ta mai em ni tih Mizoram sawrkar kan zawt a ni,” a ti bawk.