Russian sipaiten Ukraine-a power siam chhuahna hmunpuite an chhut nawn leh avangin Kyiv hmun thenkhat leh khawpui dang eng eng emaw zat chuan electric leh tui an dawng thei lo mek.
Prosecutor-te chuan an khawpui ber beihnaah hian mi pahnih an thi tih an sawi a. Dnipro lui bul maia power station atang chuan meikhu a chhuak hluah hluah bawk.
Kyiv khawthlang, Zhytomyr-ah chuan tui leh power an nei lo vek a, Dnipro hrula station pahnih kah chhiat a ni.
Thawhlehnia an beih thar leh hi a hma lawka kamikaze drone an tih hmanga Kyiv beih a nih hnu lawkah a ni.
Ral atanga khalh drone-te hi Iranian siam nia hriat a ni a, an khawpui berah hian mi panga vel thiin hmar lama Sumy khawpuiah mi pali an thi bawk a. Hmun pawimawh tak tak an bei a, khaw za chuangin power an neih loh phah.
President Volodymyr Zelensky chuan Thawhlehni khan Twitter-ah ni riat liam ta chhunga beihna an tawrh avangin ‘Ukraine-a power station awm 30% vel a chhia a, hei hian ram pumah thimna a siam ta’ niin a tar lang.
Russia hian Ukraine beihnaa thapui an thawh thar lehnaah hian an hmabak ram lak turah tuan lovin khawpui lianten electric an lak luhna hmunpuite an tum ta zawk a. Thuneitute chuan siam that tumin bei nghal zel tho mah se an kah chhunzawm zel avangin chet chak a har a; thlasik lo thleng mai tur nen, system an titha hman dawn em hriat theih a la ni lo.
Thawhlehnia Russian chet thar lehnaah hian drone an hmang tel leh em tih hriat chian a la ni lo va; Ukraine chuan bomber-ten missile leh S-300 anti-aircraft missile an kah chhuahin chhim lama Mykolaiv khawpui chu a hma zan zankhuanin kah a nih thu a sawi a. Khawpuia pangpar zawrhna dawr pawh a chhia.