Serie A mawngphah a awm mek Sampdoria lakah AS Roma in hnehna an chang a, league table-ah palinaah an inhlangkai.
Thawhtanni zana league inkhelah Roma tan hian midfielder Lorenzo Pellegrini chuan inkhel a goal awmchhun a khung a. Stadio Luigi Ferraris-ah inkhel tan hnu lawka penalty an hmuh chu goal-ah a khung.
Sampdoria in Alex Ferrari handball avangin he penalty hi an chawi a. Goal hlauhawm tam lohna inkhelah Pellegrini-a’n goal awmchhun ni turin a khung.
Second half-ah Roma an hlauhawm zual a, Sampdoria an inven nasat a ngai hle.
Roma midfielder Nicolo Zaniolo chuan remchang vawi hnih a neih chu ho takin a kal ral tir a, striker Andrea Belotti pawhin goalkeeper Emil Audero a paltlang thei lo.
Zaniolo hian huntawp dawnah goal a khung a, mahse offside avanga pawm a ni lo bawk.
Jose Mourinho-a pawlte hian anni aia point li a sang zawk Napoli chu Pathianni zanah an mikhual ang.
“Inhliam kan neih zawng zawngte thlir telin kan theihtawp kan chhuah a, hnehna phu takin kan chang. 1-0 chauh nimahsela chak kan phu a, a tawp lama theihtawp kan chhuah dan thlir chuan 1-0 aia chiang zawk kan phu.” tiin Mourinho chuan a sawi.