Mi thiamte chuan Kharge-a hian BJP boruak vung tak hneh theih tur chuan hmabak ko tak tak a nei dawn niin an sawi.
A hmasa berah chuan Gandhi chhungkaw kaihhruai mai mai theih a ni lo tih a lantir phawt a ngai dawn a, party chu ama thu ngeiin a kaihruai tih a lantir a ngai ang.
Thawhtannia vote a thlak dawn khan Indian Express chanchinbu hnenah thil zawng zawngah Nehru-Gandhi chhungkua a rawn dawn lo tih a sawi a; mahse, party enkawlnaah sulhnu an lo ngah tawh avangin an ‘thu rawn’ leh an ‘tawnhriat’ chu a ngaihthlak tur thu a sawi.
Kharge tih tur lian dang leh chu tun hnai kum eng emaw chhunga Congress chhunga lungawi lo awmte tihlungawi a ngai dawn a; tun hnaiah an hruaitu hlun tak tak thlengin an lawm lo tih an sawi chhuak hlawm a ni.
Political commentator Kay Benedict chuan Kharge-a hi party chhunga pawl hrang hrang awmte ching fel turin a tha dawn niin a sawi a, “Mi dang nena buaina siam chi a ni lo,” a ti.
Mi thenkhat chuan India chhim lam politician-te hian hmar lam, a bikin Uttar Pradesh leh Bihar-a mite angin huhang an ngah ve zo lo niin an ngai bawk a. State pahnih hi MP pawh 120 zet nei thei an ni a, henga hruaitu huhang ang hi a nei zo lo thei niin an ngai.
Chanchinbumi, Poornima Joshi chuan ram puma party tuai nung thar leh tur chuan ‘theihna a nei lo’ nia a ngaih thu a sawi.
“Mi tha leh politician hlun a ni a, tute tan mahin awlsam taka hneh theihah an ngai lo vang; mahse, Congress tinung leh tur chuan Kharge-a hian party chhunga hmun ruak awm a hnawh khat zo lo vang,” a ti.
Joshi-i chuan Modi-Shah inkawp chu a khin thlak theih a ring lo.
Hetih rual hian Joshi-i chuan Congress president thar hian ‘BJP thuthlung chu a hneh theih’ a ring thung a. “Mipui hian lehlam ai chuan a tha zawngin an chhawn a, hei hi kan la hmuh loh thil pawimawh tak a ni thei,” a ti.