Aizawl: BJP Mizoram Pradesh President Vanlalhmuaka chuan Mizoramah political party awm nual mah se BJP anga kalphung fel tak nei erawh an awm lo niin a sawi a. Party dang president-te chuan inthlan pawh duh loa an peih chhung nih an tum chu lalna leh thuneihna chiah an duh tihnaah a ngaih thu a sawi.
Thawhlehni tlaia Sialsuk khuaa thutkhawm an neihah an party kalphung sawiin, party president hi kum thum term a nih thu leh party hotuten tul an tia an pawtsei a nih loh chuan term khat hi hman a ni thin tih a sawi a. Hetih lai hian Mizoram political party-ah erawh term pawh nei loin an party president-te chuan inthlan an duh lo a, an peih chhung chu president nih an tum mai nia a hriat thu a sawi.
Vanlalhmuaka hian BJP tum ber pakhat chu hmasawnna leh mi retheite rahbehna laka chhanchhuah an duh avangin, chumia mawhphurtu lian ber, Gandhi chhungkaw kaihhruai Congress party chu India ram atanga nuai chimih hi a nih thu a sawi a. “Tunah pawh central-ah chuan Congress party chu an ding chhuak thei tawh dawn lo a; chuvangin, Mizoramah pawh hian Congress tan dinchhuah ngaihna a awm tawh lo a ni,” a ti.
BJP state president hi K. Changliana, State Vice President; Malsawmtluanga, State General Secretary leh K.Laldinthara, State Spokesperson leh party hruaitu dangten an tawiawm a ni.