Ivorian forward Wilfred Zaha chuan Crystal Palace hmahruaitu a nihna a lantir leh a. Result an mamawh a mawhphurhna latu berah tang lehin a goal khung hmangin Wolverhampton Wanderers 2-1 in an hneh.
Thawhlehni a Premier League inkhelah Palace in goal chhuah hmasa chungin hnehna an chan theih nan fakawm takin an ‘comeback’ a. An mual Selhurst Park-ah chan chhe zawkah an tang hmasa.
Wolves tan hian Adama Traore chuan minute 31-naah goal a khung a. First half kheltha tak Wolves in phu takin hma an hruai a. Traore-a’n a tauh luh hnu hian goal khung belh teuh hle in Ruben Neves chuan goal ban a pet per.
Halftime zawhah erawh Palace an insiamtha. Inkhel tan leh veleh danglman siam nghalin second 63 chhung lekin goal an khung a. Michael Olise ball cross duhthusam chu Eberechi Eze-a’n goal-ah a khung.
Minute 70-naah Zaha hun a thleng. Odsonne Edouard pass chu la in chak takin a tlan luhpui a. Chiang takin Jose Sa goal-ah a khung.
Tun season-ah a goal nga na niin Palace hi Premier League-ah 10-naah an inhlangkai.
“Chak turin kan theihna zawng zawng kan hlan a ngai a, hei hi chu Premier League a khelh chuan thil thar a ni lo. Inkhel zawng zawngah hian a ni vek.”
“First half kan khel chhe lo chungin goal kan chhuah a, kha khan rilru a ti hnual hman hle. Mahse kan beidawng miah lova, kan phu ang tak result kan neih phah.” tiin Zaha chuan a sawi.
Ama mimal bikah hma a sawnna chu sawiin, “Ball tlanpui leh ball han chawh kual ringawt aiin ka ball chan hman thiam lamah ka inthlurbing. Hei hi player naupangte hnenah pawh ka hrilh thin. Ball hman thiam a, a tha thei ang bera chhuah a pawimawh. A tul hunah chiah ball chawh tur tih hriatthiam a pawimawh.” a ti.
Coach thar a la fuh lo
An coach club lianin an laksak hnuah Brighton & Hove Albion chuan coach thar Roberto de Zerbi lalut mahse a hnuaiah an la insiamrem lo.
Table mawng lama awm Nottingham Forest nen inkhelin goal inpe lovin an inhnehtawk.
Italian coach De Zerbi hi kum 1987 a Barry Llyod hnua Brighton manager niin a league inkhel hmasa pali atanga chak nei miah lo awmchhun a la ni.