Customs Division, Aizawl hotute chuan nimin khan a chenna inah Governor Hari Babu Kambhampati kawmin Mizoram chhunga sorkar laipui hnuaia an hnathawh dan tlangpui, an hmalakna leh harsatna hrang hrangte an hrilh fiah.
Asst Commissioner, Customs Division H. L. Songate chuan an hnathawh pawimawh ber chu India ramriah him taka insumdawntawnna vil leh dan phal loh thilte luh loh nan venhimna hna thawh a ni tih sawiin, officer leh staff an indaih loh vang erawh chuan duh angin hma an lak chak theih lo thu an sawi.
Ramri-ah dan phal lova thil tawlhruk (smuggling) bungrua an man chi hrang hrang dah thatna tur hmun (warehouse) an neih that loh avangin harsatna an tawh nasa thin thu te, Foreign Post Office dinna turin Postal Office, Aizawl hotute nen indawr mek thu te, Lawngtlai Silsury-ah Customs Office hawn a tul thu te, Zokhawthar Land Customs Station-ah wifi connection, ICES mapping, bank authorisation te tihfel a nih tawh thu an sawi.
Tun aia khauh zawka dan lova bungrua tawlhrukte hrek (anti-smuggling operation) theih tur chuan heng hmun – Zokhawthar, Hnahlan, Vapar, Ngur, Zote, Tlangsam, Farkawn, Sesih, Vangchhia leh Vaphai-te vil a tul thu a sawi bawk a ni.
Larsap chuan Mizoram-a customs division-ten harsatna tam tak karah theihtawp an chhuah thin avangin lawmthu a hrilh a. An hmalak zelna turah theihtawp chhuahpui zel a inhuam thu leh harsatna an neite chu a hnenah lehkha ziakin theh luta a theih ang anga bawhzuisak tur thu a hrilh.