Germany a cup inelna lian DFB Pokal second round tling zo lo zingah Bundesliga club Borussia Monchengladbach an langsar a. 2-1 in second division hmahruaitu SV Darmstadt 98 in an hneh.
Merck-Stadion am Böllenfalltor a inkhelah Darmstadt tan substitute Aaron Seydel chuan second half-ah chakna goal a khung a. Second round inkhel zinga inbarakhaihna lian ber a thleng.
Mualneitu lamin minute 23-naah Phillip Tietz hmangin hma an hruai a. Hei hi second half tan tir lamah Gladbach tan wing-back Luca Netz chuan Alassane Plea siamsak atangin a sut a, chak zui tura ngaih an ni.
Mahse Darmstadt an tho lehnghal thei a, Gladbach tlarhnung in Seydel an veng thei lo.
Inkhel dangah Hoffenheim in Bundesliga mawng lama awm Schalke lakah goal nga khungin 5-1 in hnehna an chang. Hoffenheim tan striker Mu’nas Dabbur chuan goal hnih a khung.
Hoffenheim tan hian midfielder Angelino bakah Ozan Kabak leh Pavel Kaderabek ten goal dang an khung.
RB Leipzig striker Yussuf Poulsen chuan a team tan goal hnih khungin 2.Bundesliga a khel Hamburg SV lakah 4-0 in a chakpui.
Denmark international hian minute 33-na leh 36-naah goal a khung a, April thla hnuah a vawikhatna atan goal a khung leh chiah a. Defender Mohamed Simakan leh midfielder Benjamin Henrichs ten goal dang an khung.