Home Minister Lalchamliana hova sorkar hotu leh tlawmngai pawl hruaitute nimina SAD Conference Hall, MINECO-a thukhawm chuan kumin Krimas, kumthar leh puja (Diwali leh a dangte) lo thleng turah halpuah, halmawi, silai lem mu nei chi leh sky lantern khap an rel.
Thukhawm chuan halmawi, puak thei thil leh a dangte khapna thupek chu a rang thei ang bera tihchhuah an rel a, khapna thupek tihchhuah a nih veleh sorkara dan leh thupek kengkawhtuten hma la nghala veng hrang hrangah tlawmngai pawl leh local council-te pawhin anmahni zawn theuhah hma lak tan nghal theih tura ruahmanna siamte an tel a ni.
Minister hoa thukhawm chuan halpuah, halmawi leh a dangte mihring hriselna atana a pawizia inzirtirna leh hal lo tura mipui thinlung hneh tura campaign uar leh zuala kalpui an rel a, veng tina information mike te, print leh electronic media te leh social media kaltlangin inzirtirna kalpui tam turin ruahmanna an siam.
Assam Rifles, BRTF, BSF leh sipai hmunah halpuah an hal lohna turin khapna order pek an rel a, Mizoram ramria check gate awm zawng zawngah uluk lehzuala lirthei lo lut endik tur te, sumdawnna hmun leh kudam te a tul dan azira endikte leh police bakah tlawmngai pawlten hunpui laiin duty tur insiamte an rel bawk a ni.
Sorkar hotute leh tlawmngai pawl hruaitute thukhawm chuan sumdawngte mai bakah mi mal leh chhungkaw tinte chu halpuah, halmawi, sky lantern leh silailem mu kapchhuak theite hi chah lo turin an ngen a; lo chah ru emaw, zuar emaw an awm a nih chuan dan angin hrem an ni dawn.
Thutkhawmah hian kum kaltaa khapna kalpui a nih dan thlirlet a ni a. Krismas leh kumthar bawra dan bawhchhia mi 26 man niin thubuai 23 ziah luh a ni a, court-in an zinga 18 a hrem tawh a, court case kal lai mek panga a la awm a ni.