Atletico Madrid chu 1-1 in Rayo Vallecano in an La Liga inkhelah an chelh a, huntawp dawnah Rayo striker Radamel Falcao chuan a team hlui lakah goal pawimawh a khung.
He result avang hian Atletico Madrid hi league-ah pathumnaah an la awm a, point nga in hmahruaitu Real Madrid an pha lo mek. An chung chiah a awm Barcelona nen a sang pahnihte hi khelh khatin an khel tlem zawk.
Thawhlehni zan Wanda Metropolitano a inkhelah Atletico Madrid in an tih fo thin angin ‘high pressing’ khelin rim takin an thawk a. Tlan hnem hle in an khingpuite tan ball khawih reina hun an siam ngai lo.
Minute 20-naah an football khelhin rah tha a hring a, Antoine Griezmann chuan Rayo defense inkarah ball tha a pe lut. Hei hi Spain striker Alvaro Morata chuan lo la in tun season a a goal ngana atan a khung.
Rayo in an tlarhmaah kum 36 mi Falcao an ring a, Colombian striker hi chance tha erawh siamsak an harsat. Atletico atanga loan a an hawh Sergio Camello chuan vawikhat goal a khung teuh hle bawk.
Minute 90-naah erawh Rayo tan lawmna a thleng. Jose Gimenez handball avangin VAR hman a ngai a, penalty an hmu. Kum 2011 leh 2013 inkara Atletico tana goal 70 khungtu Falcao chuan goal-ah a chantir.
A team hlui laka a goal khung hi lawm lo mahse Rayo an lawm a, away point khat an tan a hlu.
Atletico Madrid head coach Diego Simeone chuan, “First half a inhawng tawk lo, mahse second half-ah goal khung theihna huntha kan neih nual avangin inkhel dahtha thei kan ni. Goal hnihna kan khung loh avangin si phurh sut thei dinhmunah kan dintir reng.”
“Goalkeeper chauh hmachhawn tawh chuan goal kan khung thin tur a ni. Kan hriamna in goal a hring chhuak lo, hei hi kan siamthat a ngai.” tiin an inkhel chungchang a thlirlet.
Inkhel dangah Valencia in minute 6-na a Edinson Cavani goal khung hmangin 1-1 in Sevilla an draw a. Sevilla tan Erik Lamela chuan huntawp dawnah goal a khung.
Athletic Bilbao tan Iñaki Williams leh Raúl García ten goal khungin 2-2 in Getafe nen an inhnehtawk ve bawk.