- Ruata
Mizoramah pawh an compact SUV Magnite hralh tam em em tawhtu Nissan chuan SUV thar pathum X-Trail, Juke leh Qashqai te an phochhuak leh ta a. Heng zingah hian X-Trail hi an tlangzarh hmasak ber beisei a ni.
Nissan India hian X-Trail leh Qashqai bik hi enchhinna hrang hrang bakah market feasibility study te an kalpui zui nghal dawn a. Heng Nissan SUV te hi thenkhat chu khawvel huapa hralh chhuah mek tawh te an ni a, hetihrual hian tuna a thar tur te ho erawh hi chuan CBU an tih Completely Built Up a ni dawn a, siam pum sa veka lakluh a ni dawn tihna a ni a, heng SUV te hian Nissan e-Power hybrid technology an nei vek dawn bawk a ni. Nissan X trail hi tlangzarh hmasak ber a ni ang a, Qashqai in a rawn zui dawn a, an tlangzarh hun tur erawh puanzar a la ni leh dawn a ni.
An tlangzarh hmasak ber tur Nissan X-Trail
Khawvel hmundangah chuan Nissan X-Trail hian 1.5L turbo petrol mild hybrid leh strong hybrid khawl te a hmang a. Mild Hybrid zawk hian 2 Wheel Drive system a nei a, 163PS power leh 300Nm torque a pechhuak thei a ni. 0 to 100kmph chu second 9.6 -ah a kai hman a, a top speed 200kmph a ni bawk a ni. 1.5L turbo with e-Power strong hybrid version zawk hi chu 2 Wheel Drive leh All Wheel Drive drivetrain system te duhthlan tur a awm dawn thung a, he khawl hian 204PS power leh 300Nm torque a pechhuak thei dawn a, a AWD zawk hian 213PS power leh 525Nm torque bawr vel a pechhuak thei dawn bawk a ni. e-Power 2WD leh AWD variant te hian 0-100kmph chu a indawt dan hian second 8 leh second 7 ah te a thleng thei dawn a. 2WD hian topspeed 170kmph a nei a, AWD zawk hian topspeed-ah chuan electronic speed limit 180kmph a nei thung a ni.
Nissan X-Trail dung, a vang leh a san zawng hi a indawt dan hian 4680mm, 2065mm leh 1725mm te a ni a. Wheelbase 2705mm leh ground clearance 205mm te a nei bawk a ni. He SUV thar tur hi 5 leh 7-seater a awm rin a ni a. A thutna tlar hnihna leh thumna te hian 40:20:40 leh 50:50 split ratio a nei dawn bawk a ni. X-Trail in a neih langsar deuh tur chu ADAS (advanced driver assistance system) suite a ni a. Himna hmanraw hrang hrang automatic emergency braking, adaptive cruise control, blind spot detection leh front collision warning te a nei dawn bawk a ni.
Kentel hrang hrang 360 degree camera, 10.8-inch Head-Up Display (HUD) unit, 12.3-inch digital instrument cluster, 12.3-inch touchscreen infotainment system with smartphone connectivity, tri-zone climate control, electronic parking brake, electric tailgate leh LED headlamp te a nei dawn bawk a ni.
Nissan hi company hlun leh tha tak Japan ram chhuak a ni a. Khawvel huapin lirthei tha tak tak leh changkang tak tak an tichhuak thin a. India rama an huang an rawn zauh tur pawh hi lirthei leitute tan chuan chanchin lawmawm tak a ni a. Nissan X-Trail hi SUV man to leh changkang tak a ni a. Rs Nuai 30 atanga 40 inkar chho vel man tur a nih hmel a, Toyota Fortuner leh a tlukpui dangte ho nen an inel dawn a ni.