Synfo leh Central KTP thawk dun buatsaih, ‘Praise on 2022’ zin kawng a thui zel a, top 50 round neih chhoh mek niin, mipui ngaihhlut a hlawh.
Top 50 round hi Thawhlehni zan atang khan Republic Veng Presbyterian Kohhran Hall-ah neih tan a ni a, hemi zan hian mi 19 an in lan a. Ningani zanah chhunzawm leh a ni anga, top 50 round zan hnuhnung ber zirtawpni zanah top 20-a in hlangkai te hming puan chhuah a ni ang.
Intihsiakna stage a san chhoh ang zelin top 50-a in hlangkai te hi an zaithiam tlang tawh hle a, he round-ah hian music track nen an zai tawh a; top 50 round neihna hmun Republic Veng Kohhran Hall chhung thawm pawh a tha in, mipui kut beng thawm ri a ring.
Top 50-a in hlangkai, in lan tawh leh la in lan tur zingah hian Mizo Idol leh zai intihsiakna lian thama lo tel a, stage sang zawk thlengte pawh an awm nawk a ni.
Elimination round-a in lan mi 379 zinga a tha zual mi 50 thlan chhuahah hian a tam zawk chu Aizawl khawpui chhung brang mi te an ni a, mi 14 te erawh Aizawl pawn atanga tel te an ni.
Praise on 2022 intihsiak lai hi Live-in Hruaina Eng channel leh Synfo Youtube channel-ah te pek chhuah thin a ni a, top 50 round atangin entu an pung chho hle.
Ruahman lawk danin tunkarah top 50 round neih zawh a ni anga, a tha zual 20 te chu October ni 27-29,2022-ah Chaltlang Presbyterian Kohhran Hall-ah intihsiakna an nei leh ang.