President’s Cup ni hnihnaah Mizoram cricket in mellung thar a kai a. A vawikhatna atan hmeichhe umpire in inkhel a kaihruai.
Suak Cricket Ground a inkhelah hian Lalmuankimi chu match umpire niin Mizoram a cricket match a hmeichhe umpire hmasa ber a ni.
Vaivakawn a cheng Lalmuankimi hi BCCI hnuaia Level O qualified umpire a ni mek.
Tualchhung cricket club-te knockout inelna lian ni hnihnaah hian Champhai DCA leh Khatla East CC te inkhel hmasa zawkah an tang a. Champhai tan Lalrempuia chuan ball 27 lek atang run 61 out lovin a siam a. Hei hi run 46 a an chak chhan pawimawh tak a ni.
Inkhel hnuhnung zawkah Lunglei DCA leh Sihphir Striker CC te an inkhel ve leh a. Sihphir Striker ten run 55 in hnehna an chang.
Vuak hmasak tir Sihphir tan Rony Lalruatpuia chuan ball 42 atangin run 37 a siam a. Lalruatpuia leh Zothansanga ten an thlawp tha. Ball hmangin Robben Rosangzuala leh Rony ten wicket thum ve ve la leh bawkin run 55 in Sihphir striker an chak.