Aizawl : Samagra Shiksha, Champhai dist Project office-in Education training hall, Champhai-ah Rangotsav Exhibition of Mizo Handicrafts puala hun hmangin, Champhai district-a Middle School zirlai ten kutthemthiamna hmanga an thil siamte phochhuakin an inel.
SDEO Champhai Lalhruaitluangi’n Rangotsav chuan zirlaiteah lehkha zir ringawt ni lo, kutthemthiamna chawisan chu a tum a nih thu a sawi a. Zirlaite theihna leh thiamnate haichhuahna tur leh lehkha an zir by-heart mai lova, an kutthemthiamna hmanga nuam ti taka hun hmanga zirna an dawn chu a tum ber a nih thu a sawi.
Rangotsav chu elementary-te tana buatsaih a nih thu sawiin, ram pakhata mi chi hrang hrang te inhrethiamtawn taka awmho theihna tura buatsaih a nih thu pawh a sawi bawk.
Rangotsav 2022, Exhibition of Mizo Handicrafts-ah hian Lalawmpuii, Class VIII, Govt. Kanan MS-in Saiip (Buara) hrui hmanga pangpar leh a khawina a siam chu pakhatna a ni a. Lalrintluanga, Class VIII, Govt. Ruantlang MS-in Mau no leh Patê a siam chu pahnihna niin, Zonunmawii, Class-VIII, Govt. Ruantlang MS La phiar chu pathumna a ni.