Aizawl: Thingtlang leh hmun kilkawr zawkah daktawr leh damdawi lama mi thiam thawktu indaih lohna kawnga harsatna eng emaw chen chu AYUSH leh ramhmul damdawi hmanga sutkian a nih mek thu Health Minister Dr R Lalthangliana’n a sawi.
Department of AYUSH, Ministry of Health & Family Welfare, Govt. of India leh Directorate of AYUSH, Govt. of Mizoram tangkawp buatsaih ni thum awh tur, ‘AROGYA MELA 2022’ chu Nilaini khan health minister-in Dawrpui Maultipurpose Centre, Aizawl-ah a hawng.
Hawnna inkhawmah thu sawiin Mizoramah ramhmul damdawi tak tak awmte hi thiamna sang neiten eizawn nan hmangin, ramhmul damdawi atanga thil siam chhuah neih belh zel dante ngaihtuaha hma lak zel a duh tih a sawi.
Health minister hian, “Thingtlang leh hmun kilkhawr zawkah daktawk leh damdawi lama mi thiamte indaih lohna avang leh damdawi man a sang tial tial avangin mi harsa zawkten dam lohna thilah inenkawlnaah harsatna nasa tak an tawk thin a, heng harsatnate hi eng emaw chen chu AYUSH leh ramhmul damdawi hmanga sutkian a ni mek,” a ti.
Mizoramah thawktu tlem tein thahnemngai taka an thawhna a zarah AYUSH pawimawhna leh tangkaina a hmu zel tih sawiin, AYUSH science kaltlangin ram chhunga ramhmul damdawi hman thinte chu zirchiang a, uar leh zuala hman tangkai leh humhalh a pawimawh tih a sawi bawk.
He huna khual zahawm, Health & Family Welfare Development Board Vice Chairman Dr. ZR Thiamsanga chuan pawhin AROGYA MELA 2022-in a tum ber chu hriselna kawnga hmasawn a nih thu a sawi.
AROGYA Mela 2022-ah hian stall hrang hrang inpho chhuak firm 20 vel an awm a. Mela chhung hian free clinic, seminar, farmers’ meet, medical plant display, live yoga demonstration te buatsaih a ni dawn a ni.