Japan-a an hnam thil hlu (cultural heritage) humhimna kawnga thawktu chuan a car-in an rama inthiarna (toilet) hlui ber, Buddhist temple upa tawh taka mi chu a su chhe hlauh.
Tofukuji, Kyoto-a vantlang inthiarna hmun hi kum zabi 15-na hun laia mi tawh niin an hnam thil hlu ro ber zinga mi a ni.
Police chuan he hmuna thawktu pakhat chuan a car chu a hma zawnga kal tum a nih laiin a hnung zawngin chak takin a tlan thut a, a kawngka pawh a su chhe vek niin an sawi.
Tu mah inhliam an awm lo va, a chhunga inthiarna (latrine)-te pawh a awm pangngaiin a la awm.
Kyoto Heritage Preservation-a thawk, a hming tar lan loh hian police a hrilh nghal a. Amah hi a hna thila temple tlawh tura kal niin Sankei Shimbun chanchinbu chuan a tar lang.
Chanchinbua thlalak tar lanah chuan car hian kum 700 zeta upa tawh inthiarna kawngkhar leh a bante pawh a su chhia tih a lang.
Tofukuji Research Institute-a an director, Toshio Ishikawa chuan he chetsualna thleng hi pawi a tih thu a sawi.
Thuneitu dang pakhat chuan thil chhiate chu siam that leh theih a nih thu a sawi a, a nihna pangngai anga din thar leh tur erawh chuan hna tam tak a awm thu a sawi bawk.
Vantlang inthiarna, tōsu hi Muromachi hun lai (1336-1573)-a siam niin Tofukuji temple chhunga awm a ni.
‘Hyakusecchin’ tia an sawi hi a ruala mi 100 inthiar theihna niin temple-a monk nih zirlai 100-ten sakhuana thila mahni inthunun zirna atan an hmang thin niin Asahi Shimbun chanchinbu chuan atar lang.
Chanchinbu hian lung intlarah a biala kua 20 vel awm niin a tar lang bawk.