Khawih thiang lo tia tun hmaa an sawi thin, Dalit hnam, Karnataka chhuak Kharge-a hi politics-a a inhnamhnawihna a rei tawh hle.
Kum 1942-a Bidar district-a piang a ni a, an thenawm, Gulbarga district-ah pemin hetah hian a sei lian a. Dan a zir chhuah hnuah labour union tan a ding zing hle a. Zirlai a nih atangin politics a ngaihven tan a, kum 1969 khan Congress party a zawm ta a ni.
Kum 1972 khan hetih laia an state-a an party chief, Devaraj Urs chuan hnam thaho chenna, Gurmitkal biala assembly inthlan chuh tura a tihna zawmin a ding a. A tirah a tlin rinna hniam hle mah se a tling a, vawi kua zet a zawnin he bialah hian thlan tlin a ni zui ta hial a. Chitapur-ah pawh ding tawhin a tling tho bawk.
“Dalit hruaitu atanga bul tan ni mah se hnam zawng zawngin hruaitu ena an enah a inchhuah,” tiin political analyst Indudhara Honnapura chuan a sawi.
Mi kaihhruai thiam tak, Kharge-a hi state sorkar hrang hrangah minister a lo ni tawh thin.
“Sorkar hnathawk liante lakah a polite em em reng a, hetih rual hian ngaihdan nghet tak neiin chu chu a tilang mai thin bawk,” tiin Honnapura hian a sawi.
Kum 2009 khan Delhi-ah politics a khelhna sawnin Lok Sabha member atan Gulbarga bial atangin a vawi khat nan thlan tlin a ni a. Kum 2014 khan tling nawn lehin kum 2019-ah erawh BJP candidate a hneh lo va. Kum 2021 khan rorelna in sang zawk, Rajya Sabha-a thu tura thlan tlin leh a ni.
Parliament-a in hnihah hian eptu leader a lo ni ve ve tawh a, cabinet minister pawh ni tawhin railways leh labour & employment ministry a enkawl thin.
Tuna a nihna thar erawh politics a khelh chhunga a hautak ber a nih hmel a, Modi-a leh Amit Shah-a’n BJP a hruai leh Congress party hniam lai intawng fuhin an ngam lo hle.
Kum 2019 inthlanah pawh Congress hian bial 545 awmnaah bial 53 chauh changin BJP chuan bial 303 zet an chang thung.
State hrang hranga ro an relna thin pawh an chân chak hle a, tunah chuan state pahnihah chauh a fawng vuantu an ni tawh.