Aizawl : PC party-in zirlaite scholarship pe chhuak thuai turin Mizoram sorkar an phut.
Zirlaite scholarship tur sorkar laipuiin Mizoram sorkar kuta tun thla ni 4-a a hlan tawh pe chhuak thuai tura chak taka hma la turin thuneitute an phut tih PC party chuan an sawi a. Pechhuak tura lungawi lova nawr chawp kher ngai lo tur leh chhuanlam dang siam chawpa hrek khawtlaisak lova, a rang thei ang bera pe chhuak tura an phut thu an sawi.
PC party chuan “mimal, chhungkua leh pawl anga thawh hlawh sorkar atanga hmuh tur te emaw, hamthatna sum dawn tur te emaw hrek khawtlaisak thin kan nih avanga nawr luih kher ngai sorkar kan hrawn thin hi khamawm kan ti tawh takzet” an ti bawk.
Scholarship chungchangah hian kar kalta Inrinni khan PC thalai pawhin thuchhuah siam tawhin, Mizoram sorkar chu a intiam anga zirlaite scholarship tun- kar chhung ngeia pe turin an phut a. “Tunhnaiah RIPANS, ZMC, ITI leh DIET zirlaite scholarship pe thuai tura zirlai hruaitu ten an ngen ngai khawpa Mizoram sorkarin zirlaite scholarship a hreksak hi hriatthiam harsa kan ti” tiin, Mizoram sorkar an dem thu an tarlang bawk a ni.