Assam Accord Minister Atul Bora chuan All Assam Students’ Union (AASU) pisa, Swahid Nyas, Guwahati chu nimin khan tlawhin zirlaiten he accord hnuaia tihhlawhtlin an duhte chu tihhlawhtlin a tum thu a sawi.
Bora hi tun hmaa AASU-a lo tel hrep tawh niin politics-ah a lut zui a, zirlai pawl hruaitute nen an inkawm.
Zirlai hruaituten Assam Accord-a peng hrang hrang a taka kalpui an duhte chu tihhlawhtlin a nih theih dan tur an sawi a, heng zingah hian zirlaiten an lo nawr thin tawh, Clause 6 kalpui a nih theih dan turte pawh a tel.
Assam-a BJP thawhpui, Asom Gana Parishad (AGP) president ni bawk, Assam Accord Minister Bora hi he portfolio changtu minister zinga AASU pisa tlawh hmasa ber a ni.
“Assam Chief Minister Himanta Biswa Sarma hian Assam Accord hi a taka chantir a duh hle a. Hemi atan hian sorkar pawhin AASU hi a hnimhnai hle a ni,” a ti.
AASU hruaitute pawh minister meuhvin an pisa tlawha a taka Assam Accord kalpui dan turte a sawipui avang hian an beisei a sang hle.
AASU Chief Advisor Samujjal Bhattacharya chuan beiseina an neih thu sawiin kum 1985-a Assam Accord ziah hnua hmasawnna lian tak a nih thu a sawi.
Bhattacharya chuan an state sorkar hian AASU hruaitute chu Assam Accord tihhlawhtlin a nih theih nan lengah a sawm thuai a beisei tih a sawi bawk.