India ram khawpui ber, Delhi-ah chuan boruak bawlhhlawh telh telh zel avangin Diwali chhunga a lawm nana halpuah leh halmawi hal man chu thla ruk thleng lung in tantir theih an ni dawn tih environment minister chuan a puang.
Khawpui sorkar hian a hal mante hi Rs. 200 chawitir an ni dawn tih a puang bawk.
September thla khan halmawi lam hal khapna hi thupek chhuah a lo ni tawh a, boruak bawlhhlawh lutuk zel tur venna atan khauh lehzualin hunpuiah kalpui a ni dawn a ni.
Delhi khawpui hi khawpui lian zingah chuan khawvela boruak a thianghlim lohna ber a ni.
Boruak tibawlhhlawhtu zingah hian thil siamna hmun atanga khu te, lirthei khu te leh sik leh sa inher vel dan te chu a chhian lianah puh a ni.
Thlasik apiangin an thenawm state-a lo neituten an thlai sengna ro an hal khuin bawhin a boruak a thianghlim lo zual ziah a. Hindu sakhaw kûtpui, Diwali-a a lawm nan halpuah leh halmawi an hal nasa zui a, boruak hniam lamah thli a thawh chak theih loh bawk si avangin a bawlhhlawh a kai rei zual thin.
Hetih hun lai vek hi chhum chhah takin khawpui a bawh nasa hun lai a ni a, mihring tana boruaka thil hlauhawm tak, chuapa boruak lut tur dang theitu, PM2.5 tiha an sawi mai a tam em hun lai a ni.
October 24-a kûtpui lo thleng tur hma pawhin thli a thawh nasat loh avang lehg boruak inthlak vel avangin boruak hi ‘a bawlhhlawh leh tawh hle’ tura ngaih a ni sa.
Boruak thianghlim dan tehna, air quality index (AQI) hi Delhi-ah chuan 301-400 a ni a, hei hi ‘chhe tak zet’ an tih huanga mi a ni a, zero leh 50 inkar chu ‘tha’ a ni.