October 19, 2022 (Nilaini)-a Ramhlun Indoor Stadium-a Aizawl North II Block MNF-ten Block Conference an neihnaa khuallian, Chief Minister Zoramthanga’n ‘Pathian leh kan ram tan tia mi sang tam tak thisena baptist tawh MNF Party hi kan kalsan thiang lo’ tia a sawi chu Congress party chuan politics-a a insawh nghehna tur leh hausak belhchhah zel a tumnaah an ngaih thu an sawi.
An thuchhuahah Congress party hian, MNF movement-ah khan nunna chântu Mizo tam tak chu anmahni MNF kut ngei tuara boral avangin, chhungkaw tam tak baihvai takin awm phain ram leh hnam tana nunna hlantute kha Congress Party chuan a ngaihluin a zah a, an kalsan tak an chhungte pawh Congress sorkar hunlai khan nasa taka tuam hlawm an nih thu an sawi a. Hetih lai hian, Zoramthanga kaihhruai MNF sorkarah hian ram leh hnam tana nunna hlantute leh an chhungte hian ngaihsak an hlawh lo hle tih sawiin, “Hetiang a nih lai a politics-a a in sawhnghehna tur leh a hausak zelna tura kan ram leh hnam tana martar-te hmang fo tawh lo turin MNF President Pu Zoramthanga hi kan chah a ni,” an ti.
Congress party hian MNF sorkarah hian ram tana tuartute, martarte leh an chhungte aiin Kamrula te leh MNF tana tangkaina nei miah lo ten ngaih pawimawh an hlawh zawk avangin, Mizoram tana marta chhungkua zinga ramin zalenna a neih theihna tura tha lo thawh tawhtu, lungawi lo chung chunga MNF party-a la awm lui hram te chu thangharh a, ‘Pathian leh kan ram tan’ tih thuthlung kalsantu MNF chhuahsan a, an party-a lut turin Congress chuan an sawm tih an sawi.