Khawl hmanga lirthei endikna hmun tur, Hlimena Vehicle Inspection & Certification Centre (I&C Centre) sakna tur lungphum chu nimin khan Transport Minister TJ Lalnuntluanga’n a phum.
Transport minister chuan India ram chhunga state upa tawh leh changtlung tawhte umpha turin Mizoramin tan a la tih sawiin, transport department bikah phei chuan state changkang zawkte tih dan tun hnaiah an umpha chho ve thuai thuai thei nia sawiin, lawmawm a tih thu a sawi.
Ramin hma a sawn theihna turin mi mal leh chhungkaw bil ngawt ni loin a huhoa hma sawn tlana inhmangaih tak leh inlungrual taka ke pen tlan a ngai tih a sawi bawk.
I&C Centre sakna tur hian sorkar laipui chuan nuai 1,550 dahin Mizoram sorkar nen 90:10 a intum sem tur a ni a. A building sak leh a hmunhma siam hna thawk turin Central Institute of Road Transport (CIRT), Pune hnuaiah e-tender tihchhuah niin, Vinco Construction te chu thawk tura thlan an ni.
Sorkar thuchhuahin a tar lan danin he centre-ah hian khawl leh hmanraw changkang tak hmangin lirtheite endik a ni dawn a, endikna khawlin motor a endikte a fit lo a tih chuan khawlaiah tlan phalsak an ni dawn tawh lova. Pollution check-na tha tak a nih bakah motor chuanna atana him tawk leh tha tawk a ni em tih enfiahna tha tak a ni dawn a ni.
A building sak leh a hmunhma siam hna thawk turin Central Institute of Road Transport (CIRT), Pune hnuaiah e-tender tihchhuah niin Vinco Construction te chu thawk tura thlan an nih thu sorkar thuchhuah chuan a tar lang bawk.