Aizawl : Mission Veng, Aizawl-in an kum 125-na tlin lawmna kal mekah nimin khan Mission Veng Presbyterian Kohhran gospel centenary building-a Exhibition an buatsaih chu MHIP, Mission Veng branch President Hmingliani’n a hawng.
Exhibition-ah hian thlalak 500 vel leh bungraw hlui chi hrang hrang 39 pholan niin, vawiin thleng a awh dawn a, chawhma dar 10 – tlai dar 5 leh zan dar 7 – 9 ah te a duh apiang tan chhim theih a ni.
October ni 23, 1897-ah Mizorama sap missionary hmasa Rev. FW Savidge (Sapupa), Rev. JH Lorraine (Pu Buanga) leh Rev. DE Jones (Zosaphluia) ten Thingpuihuan Tlang (MacDonald Hill) atangin tuna Mission Venga Banglapui hmunah hian an insuan a, an insuan ní hi Mission Veng din tan ní-a pawm a ni.
Sept ni 8 khan Mission Veng kum 125-na lawmna hi tan a ni a, a lawmna pui ber chu tun kar Inrinni-ah neih tur niin, zing karah Banglapui tualah jubilee dár vuak a ni ang a, chawhma dar 10-ah jubilee lungphun hawngin, dar 10:30 atangin nilengin Mission Veng Presbyterian kohhran hall-ah an lawm dawn a ni.