Aizawl : Public Health Engineering (PHE) department hnuaia provisional employee ten an hlawh tur an lak kimlohna (arrear) chungchangah November ni 4, 2022 ral hmaa sorkar atanga thu thar lawmawm an dawng lo a nih chuan a tul anga hmalak an tum tih an sawi.
PHE Deptt. hnuaia provisional employee te chuan an hlawh tur an lak kimlohna (arrear) chungchangah hian tun thla ni 1 khan thuchhuah siamin, a rang thei ang bera pe turin sorkar an lo kar tawh a. Department dang zawng zawnga provisional employee te chu arrear hi pek vek an nih tawh laiin an ni chu tun thlengin pek an la ni lo niin an sawi.
District hrang hranga PHE Deptt. hnuaia provisional employee hruaitute leh division hrang hrang atanga member kalkhawm ten tunkar Nilaini khan an arrear chungchang hi an ngaihtuah a. November ni 4, 2022 thleng sorkar chu ngaihchan leh a, chuta an la hlawhtling lo a nih chuan a tul anga hmalak zui an tum thu an sawi a ni.