Liverpool tan striker manto Darwin Nunez chuan Anfield-ah a vawikhatnan goal a khung a. West Ham United an hneh phah.
An hmelma Manchester United in manager Erik ten Hag hnuaia an khelh that ber tum an hmang a, Tottenham hneh taka thununin 2-0 in hnehna an chang.
Striker manto chu
Liverpool in tun nipuiah Benfica atangin Uruguay striker sawihlawh Darwin Nunez an lalut a. A man atan Pound maktaduai 64 pe phawtin pek belh tur an la nei.
Kum 23 mi in beisei angin Merseyside-ah bul a tan lo. Inelna hrang hrangah Nilaini zan inkhel hma in goal li khung tawhin thil zahpuiawm ni lo mahse Reds tlarhmaah a inkhel in fak aiin sel a hlawh fo.
Anfield a West Ham nen an inkhelah erawh danglamna siamtu a ni a, teuh taka chance tha a hloh hnu lawkah Kostas Tsimikas ball cross chu chiang takin a tauh lut.
Hammers goalkeeper Lukasz Fabianski che tha lo se Nunez hian goal a khung nawn ngei dawn a, save tha tak a siamtir.
Lehlamah Hammers in Joe Gomez foul vangin penalty an hmu a. Reds goalkeeper Alisson chuan a dansak ve thung.
Liverpool boss Jurgen Klopp chuan, “Zaninah team pahnih intluk tak an inkhel a, hetiang inkhela kan chak hi a pawimawh hle. Tun season-ah hetianga chak hi kan neih mang loh avangin hnehna chan dan pawimawh tak a ni.” tiin an inkhel a sawi zui.
Ten Hag-a Man United
Old Trafford-ah Manchester United in team lian zing ami Tottenham Hotspur an mikhual a. Kawng engkimah chungnung zawkah tangin 2-0 in an hneh.
Manager Erik ten Hag hnuaia an khelh that ber tum United in an hmang a. First half-ah Tottenham goalkeeper Hugo Lloris vang liau liau in goal engemaw zah an khung lo zawk.
French goalkeeper in halftime hma in save tha vawi nga a siam a ngai a. United hian chance vawi 28 neiin heng zinga 19 hi first half-ah a ni.
Second half-ah erawh an nghak rei lo. Kheltha tak Fred-a’n goal a khung a, a goal luhna turah Ben Davies chuan lo dang pial mahse goal khung phu in a khel.
Minute 69-naah United bawkin goal an khung a, Bruno Fernandes chuan an goal hnihna a pet kual lut mawi hle.
United in an pu duhdanin ‘high press’ an khel a, Tottenham player tha rualin an duh angin ball an khawih tak tak hman meuh lo.
Fred, Fernandes leh Casemiro te a laiah an fakawm a, full-back Diogo Dalot leh centre-half pahnihte an nghet. Chutihlaiin tlarhma a thawkrim pathumte ‘press’ dan kha an midfielder ten ball chhuhsak an ngah phah chhan lian tak a ni.
United chetthat ber tuma sawi hlawh erawh Cristiano Ronaldo a ni a. Kum 37 mi forward hlawh hnem hi subsitute bench atang luhtir a ni lova, minute 90 naah a team kalsanin khelmual chhuahsan chuan sawi zui a hlawh hle.