Mizoram hmeichhe cricket team chuan Senior Women’s T20 Trophy-ah hnehna an chang a, Meghalaya nen inkhelin wicket 8 in an chak.
Alur Cricket Stadium II a inkhelah Mizoram in vawm hmasak an thlang a. Meghalaya hi over 18 chhunga vawi out zovin run 91 an siamtir.
Mizoram tan leg spinner Lalnunsangi Ngurte a che tha a, wicket li la in Meghalaya middle-order insiamrem hman miah lovin a siam. State pawn player Tarang Jha in a tawp a khar tha a, wicket thum a la ve bawk.
Stump out vawi hnih nei wicketkeeper Lalremruati Pautu a tangkai a. Meghalaya innings a run siam hnem ber wicket hi Lalhriatpuii’n a la ve thung.
Mizoram in an vuak hun a thlenin Tarang Jha a che tha a, run 57 siamin a tawp thleng a dam. Lalrinfeli’n run 14 siamin tualchhung batter dang pahnihten an dinpui hman bawk a. Over 16.3-ah harsatna lian nei lovin Mizoram in run 95 an siam thei a, hnehna an chan theih phah.
Kumin atangin BCCI hnuaia inelna kalphung thlak danglam a ni a, team nem zawka ngaihte dahna thin Plate Ground awm tawh lovin team tel zawng zawng dah pawlh an ni tawh. Mizoram hi Group A-ah awmin team tha Uttar Pradesh, Andhra Pradesh tihte nen an inel tawh.
Match khat khelh hmabak an la nei a, Inrinni hian team tha dang Odisha nen an inkhel leh ang.
Mizoram manager Lalrinchhana Sailo chuan, “Vawiin chu engkim kan tan a kaltluan ni kan tawng a, kan che tha hle. Kan awmna group-ah hmarchhak team dangte hi kan tan hneh theih an ni ah kan ngai a, hei vang hian Nagaland nen kan inkhelhin chak tum takin kan khel a, kan chetsual phah. Tun tuma kan inkhelh dawnin pressure awm lova nuam ti taka inkhel turin kan infuih a, chu chuan awmzia a nei.” a ti a.
“Result ngawr ngawr duh chuan inel dan phung hmasa kha a tha zawk anga, mahse tuna team tha te nen han inkhelh hi kan player-ten hma an sawn phah. Tun tournament a kan inkhel apiangah kan team atanga run siam hnem ah pawh vawiin tih loh chu tualchhung player an la ni deuh zel. Team tha Uttar Pradesh nen kan inkhelh pawh khan kan chhaihbuai ve thei viau a. Kan inkhelh zawhah pawh hma kan sawnzia sawiin Mizoram min fak ve hle.” a ti bawk.