- Mahmuaka Chhakchhuak
September 30, 2022 zan kha CoviD boruakin min chimbuai hnua Lunglei khawpuia thalai rual hlim zan ber a nih loh pawhin a pahnihna chu a ni ngei ang. Engvang nge kan tih chuan Saikuti Hall-ah Concert a awm tlat alawm.
Tunlaia zaithiam lar berte zing ami Rebecca Lallawmsangi, Saiwanah leh Young Fella-te chuan Lunglei khawpuiah Concert an neih dawn thu chu hun rei deuh tawh atang khan kan lo hria a. Hmuh loh luih pawh tum ila hmuh loh theih loh turin Social media lamah a darh chuai chuai bawk avang chuan Lunglei thalaite hian an hlut angem aw tiin ngawi rengin a hun lo thleng tur chu kan lo nghak ve ringawt a. A hun a thleng dawn ta a, Sept 29 zanah Aizawl atangin zaithiamte pawh Lunglei an rawn pan a, kalkawngah harsatna engmah nei loin tluang takin zing lam dar 3 velah an rawn thleng a, engmah dang sawi loin an mu nghal a, zing lam dar sawm velah chuan an rawn tho harhin zan lama an Concert neihna hmun turah kalin an hun hmanna hmun tur velte chu an thlir kual a. Chutih lai chuan Lunglei thalaite pawh zan lama Saikuti Hall-a Concert en ngei tumin an lo inbuatsaih mek bawk a.
Zaithiam zing ami Young Fella hi khawzawl tlangval a nih avangin leh a nu hi ka pu (ka pi nuta) fanu a nih avangin kan inti unau em em a, chutiang bawkin apa lah pi leh pu atanga inti chhungkhat hnai em em kan lo nih bawk a. Chutianga kan nau YongFella’n Lunglei a rawn kal lehah pawh hian remchanna lo lak a, Lunglei khawpuia Khawzawl khua awm ang ang te’n thingpui inpuina hun a awm theih angem tiin amah chu ka bia a, a ni chuan chutiang hun a awm theih chu a ring chiah lo a. Nimahsela Concert en ve kan duh chuan tiin Ticket panga chu min reserve sak theih dawn thu a sawi chu lawmawm kan ti hle a ni. Keini pawh chuan lawm takin kan (Khawzawl khaw chhuak Lungleia awmte) WhatsApp group siam ‘WE ARE KHAWZAWL’-ah chuan post nghalin zan lama Concert en duh te tan ticket panga kan neihsa thu chu kan tarlang a.
Chawhnu dar 4 velah chuan inbual nawmna atan tiin 5kms vel tur hi kein ka kal a, thlantui luang zawih zawihin Inah letin fai takin ka inbual a, zanriah eikhamah chuan Saikuti Hall lama kal turin ka inbuatsaih nghal a. Dar sarih velah ka thleng a, thalai rual hi engemawzat an lo awm tawh a. Concert tan hun tak erawh dar 7;30pm an tih avangin ticket lei duh chu an in dawt zut bawk a. Tualah chuan dingin mi chevel ka lo thlir mai mai a. Chutah chuan hmuhnawm tih deuh deuh pawh ka hmu a, chung zinga pakhat chu; Concert en tuma rawn kal reng reng chuan kalpui an rawn nei deuh vek a, tleirawl leh rawlthar inkawp te tea rawn kal pawh chhiar tham fe an awm. An inchei nalh hlawm tlangpui bawk a, an hmel hmuh a nuam em em vek hlawm. Ka rilru a hlim hle mai a, a chhan chu Lunglei thalaite hi an lo hmelthain an lo nalh hlawm hle mai a, an lo changkang sawtin an che vel reng reng pawh mit ti kham tur a awm lo chu a ni. Tleirawl hmeltha tak takin an kalpuite Helmet an ken sak paha an bana an han chelh sak zui han hmuh te chuan inngaizawng an nih leh nih loh hre chiah lo mah ila, an induh hmel bik hian a hriat thin.
Tichuan le, dar 7;40 a ri mai dawn a, backstage lama awm kan zaithiamte an rawn inpeih ta bawk a, Announcer zei tak mai, Lunglei Zonuni tih mai tura aw fiah tha leh mawi Dingdingi chuan kan zaithiamte chu ko chhuakin inhmelhriattir a han nei hmasa a. Chutah chuan rin loh takin mipui lamah amah chu rawn kalin zawhna zawt duhte tan zawhna hun a han siam ta daih mai a, zawtna zawt duh an lo tam ngang mai; ka thutna hi tlar hmasa ber atanga chhiar a, pasarihna velah a ni a, ka hmaa tleirawl pakhat chuan ring tak mai hian ‘YoungFella hi ala single em?’ tiin zawhna a rawn zawt ta a, stage lam atang chuan YoungFella chuan ‘Single lo’ tihin zep lem loin a rawn chhang a, mipui lam atang chuan an lo eeeee dual nghal bawk a. Chutiang bawk chuan mipa lam lahin Rebecca Lallawmsangi chu a single leh ‘gle loh an lo zawt ve bawkin a ni chuan ‘tunah tak hian ka single‘ tiin a rawn chhang thung a.
Chutianga zai tak tak hmaa neuh neuh tih chhung chuan hun pawh alo kal ve zel bawk nain, boruak erawh a nawm phah hle a ni. A hmasa ber atan Rebecca Lallawmsangi chu zai hmasa ber turin Announer chuan a han lam chhuak a, nimahsela backstage atang chuan Rebecca chu a rawn chhuak mai bawk si lo. Music a ri a, mipui lamin mit kan len kual ruai ruai lai chuan mipui zing atangin kal pah hian a rawn zai ta ale, haw haw thawm a ring nghal kher mai. An chibai sup sup a, a thenin an lo selfie pui bawk a, an bawr luih luih a, a vengtute tan pawha buaithlak khawpin an bawh buai a, minute reilote chhungin stage hmaah chuan a za tel tak meuh hi an tlingkhawm nghal a ni. Hall chhung boruak chu thawm dang reng a leng mawlh lo a, thawm dang lo awm pawh nisela hriat theih a ni hek chuang lo ang. Mipui lam atanga aw chhe tak taka rawn te ri te chu a nasa kher mai a, chung lamah ban vaiin mahni thuthmuna lo insawi pawh an tam kher mai.
Rebecca a zai zo. YoungFella a rawn zai leh chiah, stage hnung lam atanga a rawn chhuak leh chiah chu tleirawl ho insum hman lo a au ring tak takte chu an hriatthiamawm viauin ka hria. Amah lah a zei ve hrim hrim bawk a, Stage hmaa awl chu kawkin ‘helai hi a awl zau riau mai, tlangval ho kha kan lam dawn lawm mi?’ a han tih chuan mipa leh hmeichhia, mi tupawh mai chuan an pan khawm nghal sung sung a, a leng tawk an inhnawh a, a leng bak chu stepah an intlar chho zel bawk a, kan thutna zawn thleng chuan an rawn intlar a nih chu maw le. Music a ri a, YoungFella a rawn zai ta, a boruak chu a dang zar mai a, thut mai mai a har ngawt mai. Zahzum leh inkiltawih lam reng thinlungah a lang hman mawlh lo a, kan zavai mai chuan kan ding vek emaw tih mai tur a ni. Kei lah mi che vel thlir reng renga hawi kual ka ni bawk a, hnung lam leh hma lam ka thlir kual sek a, hetiang ang em em a Lunglei Thalai rual hlima lam hi ala tam kherin ka ring lo hial. Rui buai hmel ka hmu lo a, midang tana hnawksak zawnga che lah ka hmu hek lo.
Chutianga boruak nuam taka hun kan hman chhoh lai chuan kan zaithiamte pawh an in zai chhawk chho zel bawk a, tu zai pawh mai chu mipui lam chuan kan zawm dual dual mai a, Rebecca-in ‘Tahchuan a leng’ tih hla a sak phei chuan beng ngawng tan pawha hriat phak tur khawpa ringin mipui lam chuan kan lo zai pui a, hetiang ang reng renga thalai rualin hmun khata hun kan hman nawm hi a tam kher lo ang. Tlangval pakhat nen phei chuan kan nuam ti lutuk chu nghet takin kan han in chibai ngawt a nih kha. A dik alawm, nuam kan ti ngang mai. Chutianga nuam ti taka hun kan hman lai chuan keini aia nuam ti tur hi ka hmu fuh hlauh mai a, a ni kha chuan keini aiin nuam a tiin a rinawm – A fanu, kum 3 rual vel tur hi a pawm a, Rebecca zai lai chuan a hnaih hriau hriau a, security-te chu a dil ni ngei tur a ni, a fanu chu Rebecca kiangah ava hruai a, Rebecca zai lai chu a pawm tirin thla a laksak a nih chu. Kha kher kha chu a hlim hian ka ring a, zan pawh mutui ngawtin ka ring. Ni thum chhung vel chu engmah dang a sawi hi ka ring hlawl lo.
‘Nilai zan’ tih hla hmanga YoungFella a rawn zai leh chuan kan hlimna chu a vawrhtawp a thleng tak meuh tawh a, ka tih tur hre lo lutuk chuan Khawzawl lama awm, YoungFella nu chu kan han video call ngawt mai a, ka tawng a hre thei lo a, keipawhin a tawng ka hre thei bik hek lo. Nimahsela Stage-a a fapa che vel leh mipui che vel chu hmuhnawm a tih ve ngei ka ring a, minute engemaw chen chu ka thlir tir a, a hlim ve hmel viauin ka hria. Vawi tam tak an zai a, tumah chu an zai chhe lo vek. Saiwanah pawh a zai fuh in nuam a tih ngei a rinawm. Chutianga hun hlimawm tak kan hman lai chuan ka han hawi kual teh ang tiin stage hnung lamah chuan ka va kal a, Rebecca leh YoungFella te chu thla ka lakpui a, Announcer Dingdingi pawh chibai pahin ka fak vel luam a, kan hlim tlang hle mai.
Amaherawhchu In lamah tih tur ka la neih avangin dar 9;40 Pm velah chuan ka haw san a, a hnua midang ka han zawh leh chuan dar sawm pakhat an thleng a ni awm e. Hetiang reng renga Lunglei thalaite’n hlimna kan han chang hi hriat reng tlak ni hialin ka hria a, buaina siam ka hmu lo a, mi kham tura awm ka hmu hek lo. Pathianthu lama hlimna nen phei chuan tehkhin chi a ni hauh lo ang a, thalaite hian kan khawvel hmannaah hian hetiang hlimna hi kan mamawh ve bawkin ka hria. Hripui leng boruakin rei tak min chim hnua hetiang boruak zang khai kan han nei hi a inchhir-awm loh viauin ka hria a, thalaite ngei pawhin rui lo leh buaina siam loa huau huau hun hman kan lo thiam ta hle mai tih ka hriatin ka lawm hle a ni. Saikuti Hall-ah hian mi engzatnge leng ka hre chiah lo nain September 30 zanah hi chuan a leng lo mi kan kal tih chu chiang takin ka sawi ngam, Chal pen pawh ka ngam chiang.