British Prime Minister Liz Truss-i chu Ningani khan a bâng.
Queen Elizabeth II thihna sunna hun ni 10 a liam hnuah Truss-i hian hna a tan deuh chauh va, a finance minister, Kwasi Kwarteng pawh a bân hman.
Truss-i hian Conservative party member vote thlakah vote 81,326 hmuin thlan tlin a ni a, Indian chhul chhuak, Rishi Sunak chuan vote 60,399 a hmu ve thung a. Sunak hi a hmaa Boris Johnson-a sorkarah khan finance minister a ni.
Truss-i chuan a bân thu sawiin, “Conservative Party-in min thlan chhuah ang ka puitlin thei rih lo a ni,” a ti a. A hma ni lawkin thuneihna a chan reng dawn thu a sawi a, ‘bansan ching ni lovin bei thin’ a nih thu a sawi a; mahse, a tukah a bâng leh ta si a ni.
Darkar 24 liam ta lek liam taah khan MP tam takin an sawiselna karah a ban loh tur thu hi a sawi a, “Lo ding chhuak turin ka inbuatsaih a, thutlukna khirh tak siam turin ka inruahman a ni,” a ti.
Truss-i hi ni 45 chauh 10 Downing Street-ah a khawsa hman tihin a bâng lehnghal a, UK prime minister zinga nihna chelh rei lo ber a ni ta a ni.
Ni 45 chauh hun a neih chhung hian a economic programme chuan ram pum nghawngin Conservative Party chhungah pawh ngaihdan phir a siam nasa hman hle.
An thlan chhan tihlawhtling thei lova a bân thu a sawi rual hian prime minister thar tur thlan leh a nih hma chuan a nihna chu a chelh zui dawn tih a sawi.