Zirtawpni kalta October ni 14-a Lawng- tlai dist Rulkual khuaa electric line chhia siamthaa hnatlang zing ami ten vanduaina an tawh chungchangah member pathum awmna departmental inquiry commission-in nimin khan Rulkual khua tlawhin, vanduaina thlenna hmun te an enfiah a, khawtlang hruaitute an kawm bawk.
Tarlan tawh angin Zirtawpni kalta khan Rulkual-a electric line chhia siamthaa hnatlang zinga mi 5 te chu electric current-in manin, 3-in nunna chanin, 2-in hliam an tuar a. He vanduaina thlen chhan hi chiang taka hriat la ni lo mahse, Bungtlang South line kal tir dan fel tawk loh vang nia hriat a ni.
Paithar group yo0 ung Lai Association chuan nimin khan thuchhuah siamin, vanduaina thlen chhan dik tak leh mipui tana himlo taka electric line kal tirtu chhui chhuaka, a mawhphurtu chu a phu tawk hre- mna pek ngei an phut thu an tarlang a, mipui tana him zawk tura electric line siam tha turin Mizoram sorkar an phut.
Vanduaina thlenna chu vanduaina thleng palh thei laka himlo nia an hriat thu P&E hotute hnenah pawh an lo thlen tawh thin Pathar group YLA chuan sawiin, an thu thlen chuan ngaihpaiwmawh a hlawh loh avanga vanduaina lian tak thleng ta a nih thu an sawi a. Kawlchaw line leh Bungtlang South line inhnaih lutuka kaltir, hmun thenkhatah ban intawm leh hmun thenkhatah line inhnaih tak tak te chu EE, P&E Dept. Lawngtlai division hnenah kum 2018 atang khan vawi engemawzat an thlen tawh thu an thuchhuah chuan an tarlang a ni.
Rulkual khuaa vanduaina thleng chungchangah hian Central YLA bakah Rulkual khawtlang pawhin sorkar chu thil awmdan chhui chianga, hrem ngai hrema, vanduaina tawkte zangnadawmna pe tura an duh thu thuchhuah siamin an lo tarlang tawh bawk.
Vanduaina thleng chhui chiangtu tur Departmental inquiry commission-ah hian H. Zonunsanga SE, Lunglei; R. Romawia, Chief Electrical Inspector leh Lalsangzuala Sailo, JE te member an ni a. Nimina Rulkual khua an tlawhnaah hian EE, Lawngtlai division Laldawngliana leh a thawhpui ten an tawiawm bawk a ni.