An hmelma Real Madrid lakah chiang takin tlawm mahse Barcelona in chetbuai zui an nei lo. Villarreal nen La Liga-ah inkhelin 3-0 in an hneh.
Ningani zana Camp Nou a inkhelah Barca in an mikhualte an hneh avangin pahnihna an la luah chhunzawm.
Inkhelh hma in manager Xavi Hernandez chuan a team a siksawi tur thu a lo sawi tawh a. Real Madrid hmachhawntu team atangin mi panga a thlak.
Mahse player langsar ber erawh a ngai bawk niin striker Robert Lewadowski chuan goal hnih a khung.
Rawlthar forward Ansu Fati pawh a langsar a, Polish striker in minute 31-na a goal hmahruai a khung hma in chance tha vawi thum a siam hman.
Minute 35-naah Lewandowski bawkin counter-attack atangin an goal hnihna a khung a. Minute thum hnuah kum 19 mi Fati-a’n an goal thumna Ferran Torres-a cross atangin a khung ve leh bawk.
Inkhel zawhah Xavi chuan, “Kan kheltha hle in ka hria. Zaninah kan result hmasa avangin kan thawh lehnghal a pawimawh hle. Bernabeu a tlawm leh Inter nena inhnehtawk khan kan tan boruak a ti rit zual. Inkhel pawimawh a chetthat kan mamawh a, he team-ah hian theihna sang tak a awm.” tiin an chak hnuah a sawi.