Mizoram Civil Service Association chuan nimin khan Aijal Club-ah General Conference vawi 46-na an hmang a, khuallian, Chief Minister Zoramthanga chuan ram hmasawnna atan sorkar inrelbawlna kawngah kalphung felfai tak neih a, thawktute pawhin tih tak zeta hmasawn duhna thinlung pu chunga an thawh a tul thu a sawi.
Chief minister chuan hripui leng leh thil dang dang avangin state sorkarin sum harsatna a tawk a, sorkar laipui atanga sum hmuh thin pawh vaibelchhe sang thum chuang hmuh a ni lo a, chung zawng zawng kara tun dinhmun Mizoramin a thleng chu thil vanneihthlak a nih thu sawiin, “Chumi atanga kan kal leh zelna tur chu Mizoramin resource a neih hrang hrangte tangkai thei bera hman a intun din a ni,” a ti.
Zorama chuan resource mobilization mamawhna sawiin, chung atan chuan MCS officer-te chu thurawn petu pawimawh dinhmun an luah thu a sawi a, MCS officer-te chu an hna a rinawm leh thahnemngai taka thawk zui zel turin a chah a ni.
MCSA Conference, chawhnua rorel inkhawm neihah district thar pathum – Saitual, Khawzawl leh Hnahthialah district administration tihchangtlunna tur hmalak te, Arunachal-Goa-Mizoram-Union Territories (AGMUT) cadre atang hian Mizoram tan All India Service cadre hran neih a nih theihna tura hmalak te, chak zawka Mizoram economy a than zelna tura state sawrkar hmalakna thlawp tlatte leh nasa zawka e-Governance kalpui tura state sawrkar hmalakna thlawp te an rel.
MCSA chuan an member-te chu sorkar neitu an nih angin, mi dangte aia hawihhawma, zaidam, thinnel leh thawk tam tura beisei an nih tih hria vawng tlat turin an chah a, tun aia nasa lehzuala mahni awmna theuhah tan la turin an in chah bawk a ni.
Conference-ah hian chief minister chuan MCSA Official Magazine ‘RAHBI’ a tlangzarh a, MCSA Honorary Member chatuan ram pan ta mi pathum sunna hun leh MCS officer thar mi pathumte lawmluhna hun hman a ni bawk.