India-a vaccine siamtu, Serum Institute of India (SII) chuan Covid-19 laka invenna damdawi siam an siam zinga dose maktaduai 100 zet chu a hman theih hun tawp hmaa hman a nih loh avangin an paih tih an sawi.
CEO Adar Poonawalla chuan Covishield an siam chu nikum December atang khan mamawhna a hniam zel avangin a siam chhuah an chawlhsan tawh tih Ningani khan a sawi.
Khawvela invenna damdawi siamtu lian ber, SII hi AstraZeneca-in an siam, Vaxzevria an tih, India ram chhunga hman ve tura siamtu an ni.
India rama invenna la zawng zawng zinga 90% zetin Covishield hi an hmang a ni.
India-ah hian Covid-19 vaccine hi dose tluklehdingawn hnih chuang pek a ni tawh a. Indian 70% chuangin dose hnih tal an dawng tawh hlawm niin union health ministry chuan a sawi.
January, 2022 atang khan India-ah hian damdawi ina thawk leh hri leng beihnaa a hmatawnga tangte hnena booster dose pek tan a ni a, hemi rual hian kum 60 chung lam, natna benvawn neite pek tel an ni a. Tunah erawh puitling chin zawng hnena booster dose pek kalpui leh mek a ni.
July thla khan a India-in zalenna a neih kum 75-na pualin ni 75 chhunga puitling zawng hnena a thlawna booster dose pek tumna kalpui a ni bawk.
Mahse, tun thleng hian booster dose bik hi dose maktaduai 298 chauh pek a la ni thung tih health ministry chuan a sawi.
“Booster vaccine hi mipuite hian Covid nena an inchenchilh hneh tawh em avangin an ngai pawimawh nep ta deuh,” tiin Poonawala chuan Ningani khan thuthar lakhawmtute hnenah a sawi a. “Dik tak chuan kei ngei pawh ka ni a mi dangte pawh kan ni vek,” a ti.
Poonawala chuan SII hian Covishield dose maktaduai 100 an la kawl chu thla kua chauh dam a nih avangin September khan hman tlak loh a nih tak thu a sawi.
Poonawala hian SII chuan booster dose atana hman turin Covovax enchhin an zo tawh tih a sawi a, chawlhkar hnih hnu velah hman phalna an hmuh mai a beisei tih a sawi.
SII hi US biotech company Novavax nen Omicron dona atana hman bik tur booster dose siam turin an thawkho tih a sawi bawk.