Ukraine President Volodymyr Zelensky chuan Russia-in Ukraine chhim lama hydroelectric plant tuikhuah tihchhiah tumin ruahmanna an siam niin an sawi a, he thil hi a thlen vaih chuan ‘chhiatna nasa tak’ thlentu a ni dawn tih a sawi.
Ningani zana thu a sawinaah Dnieper luia Kakhovka dam awm chu Russian sipaiten an mitmei reng niin Ukrainian information an dawn atangin an hria tih a sawi.
Dam hi Russian-ten an awm chilh lai mek a ni a; mahse, Ukrainian sipaiten an hnaih tawh hle.
Russia pawhin Ukraine hian missile-in Kakhovka dam hi an bei ve tho niin a sawi bawk.
Kherson region hmun thenkhat an awm mekah he dam hi Russia tan Dnieper lui kaltlanga an tlawhpawhna tlem awm zinga mi a ni mek a. Russia-in Kherson-a thuneitu tura an dahte chuan Ukrainian Himars rocket hmangin lui kânna pawimawh dang, Antonivskiy Bridge-ah mi pali an kap hlum niin Zirtawpni khan an sawi.
Russia hian Kherson hmun hrang hranga thuneitu tura a dahte chu tun kar chhung hian a thiar chhuak mek zel a, civil mi 50-60,000 vel zetin an chhuahsan bawk a. Kyiv thuneituten nasa taka an nawr avangin civil mite hi an chhuak nia sawiin an dem hle.
Russia-in Ukraine-a military commander thar atana a dah, Gen Sergei Surovikin chuan Ukrainian sipaite hian Kherson khawpui lakah ‘indona atana hman phal loh’ thil a ti duh mai dawn nia sawiin, hydroelectric dam beih leh civil mite thiar chhuah chu dan pel a nih thu a sawi.
US-a hmunpui nei, Institute for the Study of War chuan Russia hian ‘Kakhovka hydroelectric plant beih tumin hma an la thei’ niin an sawi a. Russian sipaiten Kherson khawthlang an chhuahsan hnuah tichhiain Ukraine-ah nasa takin lui a lian ang a, a chhehvel a tibuai thei dawn niin an sawi.
President Zelensky chuan Ningani zana EU hruaitute video hmanga a biaknaah Russia hian Ukraine-a energy infrastructure hmun thuma thena hmun hnih an tihchhiat thu a sawi a, chu chuan electric-ah leh thlasik lo thleng turah intihlumna tura harsatna a thlen niin a sawi.
Russian-in a rûn hnua a vawi khat nan Ukrainian-te chu electric hmang tlem tura tih niin ram pumah zing dar 7:00 leh zan dar 11:00 inkara hman zat tur bi an tuk thar a ni.
Presidential office adviser Mykhaylo Podolyak chuan dam tihchhiat tumna rilru hi ‘Surovikin-a ruahmanna’ zinga mi a nih thu leh tui lian nasa tak chuan Ukraine-in an nawr letna danchahna tur niin a ngai niin a sawi.
President Zelensky chuan Russian-te hian Kakhovka dam hi tihchhiat an tum tak tak a nih ngai chuan Kherson an thununna chauh hloh lovin Ukraine chhim lam pum, Crimea ngei pawh telin, an hloh dawn niin a sawi ve bawk.