Mahindra Pikup 4×4 LPS Pro Muaythai quarterfinal zan hnihna Ningani zan khan khelh chhunzawm a ni a. Mizoram a fighter thate semi-final luh tuma inbei tum nga en tur a awm.
Bout hmasa berah muaythai inelnaa la tel ngai lo kum 18 mi C Lalbiakliana lakah awlsam takin national muaythai gold medal pathum la tawh kum 19 mi Lalngaihawma a chak a, thiamna kawng hrang hrangah an inthlau.
Kum 21 mi Ramdinthara’n muaythai tawn hriat tlachham mah se national gold medal pali la tawh, kum 27 mi Paul HD Lalruatkima’n a kuttum hlauhawm taka chhuak nasa tak a dang hneh lo va, boxing khel thin leh national kickboxing gold medal dawng tawh Ramdinthara’n huaisen takin a nawr tluan.
National gold medal la tawh, kum 25 mi George Lalmuanawma’n amah aia kum thuma upa, muaythai tawn hriat tlachham Joshua L Sanate lakah hriam takin a tir atangin a khel a, ke hmang thiam zawk a nih bakah na taka a hnek ṭhin hmangin round hnihna laihawlah a nuai tlawm.
Kum 21 mi Lalramsanga’n muaythai a luhchilh aṭangin kum khat vel chauh a la hmang a, chuti chuangin national gold medal pariat la tawh, kum 28 mi Andrew Lalnunmawia a nawr hneh a; kum eng emaw chen a chawlh hnua kir leh Nunmawia’n round hnihna a tawp rualin hliam a nei a, a khelh zawm thei lo.
Kum 24 Malsawmtluanga’n ban sei leh pet thui zawk a nihna chhawrin, kum 18 mi F Zohmangaiha nen an thiam chin leh an thahrui a inchen a, an inkhawih hnem dun hle. Thiamna sang lantir zo lovin ngam takin an inbei tluan a, tharum nei leh awmkhauh zawk Sawmtluanga a dingchang hram.
Semi-final lutte hi Thawhtanni zing dar 9-ah LPS Auditorium, Zarkawtah an inbuk tha leh vek ang.
Ningani result (October 20, Bout : 5)
Flyweight
Lalngaihawma (Hunthar) bt C Lalbiakliana (Chaltlang Mual Veng)
= Technical Knockout (Round 1, 1:54 min)
Bantamweight
Ramdinthara (Pangzawl) bt Paul HD Lalruatkima (Phuaibuang)
= Split Decision (30-27, 29-28, 28-29)
Lightweight
George Lalmuanawma (Chawnpui) bt Joshua L Sanate (Zemabawk)
= Technical Knockout (Round 2, 1:34 min)
Lalramsanga (Upper Sakawrdai) bt Andrew Lalnunmawia (Zonuam)
= Retired (Round 2)
Welterweight
Malsawmtluanga (Dinthar) bt F Zohmangaiha (Zarkawt)
= Unanimous Decision (29-28, 29-28, 29-28)
D3 Haier Fighter of the Night
- Ramdinthara (Pangzawl)