Aizawl Municipal Corporation hotuten tun laia a let tam taka property tax pung thut anga thuthang awm chu thu dik lo a nih thu an sawi.
AMC hotute chuan property tax rate tihsan a nih chhan sawiin, “15th Finance Commission-in kum tin GSDP sanna ang tala tisang ngei tura rawtna a siam chu pawmin, central sorkarin state sorkar zawng zawngte chak taka hma la turin a hriattir a, hma an la lo a nih chuan sum pek chhuah a nih loh tur thu a hriattir avangin AMC pawhin property tax chhutna 3% of Annual Property Value (APV) ni thin chu 0.42%-a tipungin 3.42 % of APV a lo ni ta a ni,” an ti.
Property tax chu tihsan a nih loh chuan Mizoramin central sorkar atanga sum tam tak a dawn thinte chu a dawn theih dawn loh thu sawiin, tu party pawh sorkar se property tax chu tihsan ngei ngei a ngai niin an sawi bawk.
AMC hotuten an sawi danin, kum sarih liam ta, 2015-16 atang khan Aizawl khawpuiah property tax khawn tan a ni a, kum sarih chhung hian mipui phurrit tur venthawn vangin central sorkar nawrna nasa tak hnuaiah tax chu vawikhatmah tihsan a la ni lo. Central atanga nawrna a nasat tak avangin kuminah tihsan a ni ta a, mipuite pawhin an hrethiam tlang nia an hriat avanga lawmawm an tih thu an sawi.
Kumina tax chawi pung thut anga lang leh sawite chu a tlangpuiin in sak belh vang te, kum hmasa lama data dik tawk lo hmanga tax pek thin, data dik zawk neih a nih tak hnua chawi tur pangngai a lo lan tak vang te a nih thu AMC hotute chuan an sawi a. “A dik taka lo pe thin tan chuan a san belhna hi a tam lo hle a ni,” an ti.
“Property tax khawn tan a nih khan self-assessment-a kalpuiin, a neituin a in len zawng te, a hmanna te, a sak phung leh property tax chhutna atana mamawh hrang hrang AMC-ah a thehlut a, chumi hmang chuan property tax pek a ni thin,” tiin, AMC hotute chuan, “Data dik tawk lo a awm nia a lan avangin kum 2016-ah leh kumin kumtirah AMC thawktute leh local council member-ten Aizawl khawpuia in zawng zawng survey hna an thawk chhuak ta vek a, hei hian property tax chhutna dik zawk siamin a dik lo eng emaw zatte tan tax pek tur dik a lo lang ta a, thenkhat an tlakhniam laiin thenkhat erawh an pung ta thung a ni,” an ti.
Kum 2021-22 khan property tax atangin Rs. vaibelchhe 3 chuang hret lakluh a nih thu AMC hotute chuan sawiin, hei hi khawpui danga municipal-te tax lakluh nena khaikhin chuan a tam lo hle niin an sawi a. Aizawl mipui chanve vel chenna Shimla Municipal Corporation-ah property tax atangin Rs. vaibelchhe 19 chuang lakkhawm a nih thu leh Agartala Municipal Corporation-in Rs. vaibelchhe 10 vel an lakluh thu an sawi.
AMC hotute chuan, “Sorkar laipui chuan urban local body-te chu mahni intodelh turin a duh a, an sum dawn turte a titlem telh telh a, chutih rualin an sum lakluh titam turin a nawr reng thung,” an ti a. “Chung zingah chuan property tax lak tam hi a ngaih pawimawh ber a ni,” an ti.
Property tax chungchanga hriat chian duh neite chuan AMC office, Property Tax Section-ah office hun chhungin zawhfiah theih reng a nih thu sawiin, a chhut dan pawh langtlang taka an hrilhfiah theih thu an sawi bawk a ni.