MNF Vice President Vanlalzawma chuan ‘Pathian leh kan ram tan’ tia innghat tlat an nih avangin MNF hi a changin boral mai tur ang leh, kehchhe lek lekin awm thin mah se Pathianin a tungnung leh mai thin niin a sawi.
Nimin khan Aizawl Press Club-ah thuthar thehdarhtute kawmin Vanlalzawma hian, October 22, 1961 khan MNF chu Laldenga In, Tuikhuahtlangah din a nih thu sawiin, “A dintute kha mi ropui leh mi thiam bik ni loin mi tlawm tete an ni. Mahse, a dintute kha Pathiana innghat tlat, Mizo hnam thuthlung nghet taka vuantute an ni,” a ti.
Vanlalzawma hian, “Pu Laldenga boral hnuin hruaitu ropui tak, Pu Zoramthanga kan nei leh a, July, 1990 atang khan kum 32 zet, vawiin thlengin min la hruai a. A changin opposition-ah te kan awm leh hnuin vawiinah Zoram kaihruai turin Pathianin MNF hi a ruat,” tia sawiin, party dangte ang lo takin MNF chu president thlak ve ngai lo, party hming pawh la thlak ve lo a nih thu a sawi.
“Party President Pu Zoramthanga hi awmna sawn ve ngai lo, chhel tak leh huaisen taka a kaihruai MNF tana ding reng a ni a. Pathian rawn chunga ke pen thin, dawt leh thu dikhlel hmanga mi dang bei ve ngai lo a ni hi kan chhuang takzet a ni,” a ti bawk.
Mizorama regional party ding 25 zinga 22-te chu an ral leh mai a, national party pawh eng emaw zat rawn dinga tam tak an ral leh mai thin laiin, MNF-in kum 60-na, Diamond Jubilee lawm theia Pathianin tun thlenga a hruainaah lawmawm a tih thu a sawi a. Harsatna leh manganna namen lo lo paltlang tawh MNF party chu ‘Pathian leh kan ram tan’ tia innghat tlat an nih avangin, a changin boral mai tur ang leh, kehchhe lek lekin awm thin mah se; Pathianin a tungnung leh mai thin niin a sawi.
MNF party-in an kum 60 tlin lawmna an neih mek chu naktuk khian a kharna hunpui Vanapa Hall-ah an nei dawn a. He hunah hian MNF tana tha leh zung, ngaihtuahna lo seng tawh zawng zawng leh Mizo mipui, hnam rilru pu apiangte chu neitu rilru pua tel vek turin MNF vice president hian a sawm nghal bawk.