JP Career Point hnuaia coaching kal, Mizoram Civil Services (combined competitive examination) result chhuaka hlawhtling mi 16-te lawmpuina hun buatsaihah khuallian niin I&PR Minister Lalruatkima’n a hmanpui.
Hotel Regency-a hun hmanah thu sawiin Lalruatkima hian, Group A officer tura inziak tling thar te chu Mizoram sorkar inrelbawlna dinhmun pawimawh tak luahin mawhphurhna khirh tak tak an koah a la tla dawn tiin, Pathian tih chunga an mawhphurhna hlen chhuak tur leh mahni inrintawkna nen rinawm taka hna thawk turin a fuih.
I&PR Minister hian “Officer tha ni tur chuan inzir peih, intuai thar peih, pi leh pute’n an duh huna hrilh thei tu nih a pawimawh a, chutiangin mi tute pawh milian leh miharsa zawkte thliar loin anmahni mamawhtute tan chhanna nih an tum tur a ni,” a ti.
Sorkar chak leh chak lo nei turin sorkar hnathawkte an pawimawh em em a, Legislator ten policy leh sorkar kaldan tur tul ang an duan te tihlawhtling tur chuan sorkar hnathawkte an pawimawh tih sawiin, ram leh mipui tana theihtawp chhuah turin a chah.
Kum 2013 khan JP Career Point hi din niin, MCS ah 24, MPS ah 7, MF&AS ah 5 leh MIS ah 3 inziak tling tawhin Group B Gazetted leh Non Gazetted-ah an zirlai mi 70 chuang an inziak tling tawh bawk.