Mexico laili, Aguascalientes-a tuialhthei phur chesuala kang zui ta avangin rel kawng leh a vela chenna in tam tak a kang chhia.
Social media-a video thehdarhah chuan meikhu dum tak, van lama invawrh chhovin khawpui a tuam vek a. Video pakhatah phei chuan bungraw phur rel a kang hluah hluah bawk.
Mexico-a El Universal website chuan mi 1,500 chuang hmun hima suan chhuah an nih thu leh in leh car a kang nual tih a tar lang.
Thi an awm sawi a ni lo va; mahse, mi eng emaw zat damdawi inah hruai an ni.
Police-in truck khalhtu an man nghal bawk.
Mayor Leo Montañez chuan truck chetsualna hmunah hian chenna in 300 vel a awm a, heng zinga 120 chu a chhia tih Facebook-ah a tar lang.
Engtin chian nge tuialhthei phur hi a chetsual hriat a ni lo va. Truck hi rel nen an insu nia sawi a awm a, Reuters news agency erawh chuan overpass a su zawk niin a tar lang ve thung.
Sorkar hnuaia awm oil firm Pemex chuan truck chu an ta a nih loh thu an sawi a, kang thelh tur erawh chuan an pui nasa tih an sawi bawk.
Kangthelhtu mi 200 velin thelh tumin an bei niin El Universal chuan a tar lang.
A bul lirthei hunna hmun atanga video lakah chuan bungraw phurin kangmei karah hian kawng hi an zawh tlang tih a lang thei.