Aizawl: Zemabawk Local Council by-election leh Lunglei Municipal Council inthlan buatsaih thuai turin ZPM party-in sorkar an phut.
Zirtawpnia Aizawl Press Club-ah thu thar thehdarhtute kawmin ZPM Secretary General PC Vanlalruata chuan Zemabawk Local Council-ah MNF leh ZPM-in member pathum ve ve an neih avangin sorkar siam thei an awm ta lo a. Hei vang hian August 16, 2022-ah thiah a nih thu a sawi.
PC Vanlalruata hian, dan angin local council thiah a nih chuan thiah a nih atanga ni 60 chhungin a thara inthlanna buatsaih leh tur ni mah se, ni 60 a ral hnuah inthlang tura hmalakna pakhatmah hmuh tur a awm loh mai piah lamah, local council thiah a nih chuan danin a phut angin administrator atan local council huam chhunga mi challang (prominent citizen) dah tur a nih laiin local council inthlana MNF ticket-a tling zo lo, Kapsanga chu administrator atan dah a nih thu a sawi.
ZPM Secretary General hian Mizoram State Election Commission-ah General Administration Department (GAD) atangin inthlan buatsaih a ngaih thu engmah hriattirna a la awm lo nia an hriat thu a sawi a. “Chief minister bial chhunga vote tamna ber, Zemabawk Local Council inthlan a hun taka buatsaih a nih loh chhan a mawhphurtu, a kaikuang chu GAD changtu, chief minister hi a ni,” a ti.
Inthlan buatsaih an harsat chhan hi an hriatthiam phak bak thil a ni tih sawiin PC Vanlalruata hian, “Zemabawk mipuiten enkawltu nei loa hei chen an awm hi pawi a, kan lainat takzet a ni,” tiin, a rang lama inthlan buatsaih thuai turin sorkar an phut thu a sawi a. MNF sorkarin anmahni dan siam ngei chu khaw êng zah map loa a bawhchhetua an tang chu an dem thu an sawi bawk.
UD&PA changtu, Dy Chief Minister Tawnluia’n tum hnih lai kumin chhung ngeia Lunglei Municipal Council inthlanna neih tur a puan tawhin, sorkarin LMC e-roll pawh a tichhuak tawh niin a sawi a. Tute emaw anga tih loh tur thu pawng sawi ve mai mai ngai lo dy chief minister hian a sawi tawh chu tihlawhtlin a, LCM inthlan buatsaih ngei an phut thu an sawi a ni.