Directorate of Ayush Mizoram nen tangkawpin 225 Bn CRPF chuan an hmunpui Zemabawkah India zalenna ni vawi 75-na lawmna, ‘Azadi Ka Amrit Mahotsav’ pualin Har din Har Ghar Ayurveda (Ni tin Ayurveda, khawikipah Ayurveda) lawmna Inrinni khan an nei a. ‘The Ayurveda Day’ lawmnaah hian ramhmul damdawi chungchanga inzirtirna bakah medical camp an buatsaih bawk.
He hunah hian Dr Laltlankimi Ralte, MD (Ayu) chuan ramhmul damdawi thatna hrang hangte leh a hmannate a sawi a. Mipui nawlpui pawhin a that dan leh a tangkaina te, a hlutnate an la hriat tlem avangin an la hlut tawk lo hle nia a hriat thu a sawi a. Ram chhung mai piah lamah khawvel hual pawhin ramhmul damdawi thenkhat leh a hman tangkaina kawngah inzirtirna nasa zawka kalpui a, chawisan a tul takzet tih a sawi.
Medical camp-ah hian Dr. Lalthlankimi Ralte M.D (Ayu), Dr. Sneha Chhetri (Ayu) leh Lalruatdika (Ayurvedic Scholar) ten Zemabawk tualchhung mi zirlai leh CRPF te, an vaiin mi 150 bawr vel a thlawnin an en a ni.
‘The Ayurveda Day’ hun hman hi S.M.Habib Asgher, Commandant in a kaihruai a. Sunil Dutta Tripathi, Second-in-Command, Raja Ram Tokas, Second-in-Command, Dr. Maongmenla Pongen, CMO (OG) leh G.Singson Dy.Commdt-ten an telpui bawk.