Lunglei district level screening committee on unauthorized settlement chu Zirtawpni khan an Chairman Lunglei Bawrhsap Kulothungan hovin an thukhawm a. Dan lova din Tuichawngchhuah khua atanga sawn chhuah chhungkaw 49 te dinh- mun leh hmalak tul te an ngaihtuahho.
Lunglei District local administration officer (DLAO) PC Zonuntluangi’n Tuichawngchhuah khua atanga sawn chhuah chhungkaw 49 te dinhmun chu September ni 26-29 chhung khan an awmna kala zirchian a nih thu a sawi a. Zirchianna atanga a lan danin, Tuichawngchhuah khua atanga Tuichawng khuaa sawnchhuah chhungkaw 49 zinga chhungkaw 35 te chu Tuichawng-ah la awmin, chhungkaw dang erawh hmun dang ah an pem tawh a ni.
Tuichawng-a la awm chhungkaw 35 zinga chhungkaw 17 te hnenah in sak tanpuina PMAY(G) pek tawh niin, he committee hian la dawng ve lo chhungkua te pawh pek ve ni se, an ti a. Naupang 7 school kal lo/drop out awm te pawhin school an kal leh ngei na turin school education department chu hma la turin an ti.
Tui leh electric supply an dawn that thu leh Health department atanga vaccine, DDT spray, LLIN thosilen te pek an nih tawh thu zirchianna report-ah chuan tarlan a ni a. Tuichawng-a la awm chhungkaw 35 ten MGNREGS-ah Job card an neih vek thu leh family ration card pawh siamsak tawh an nih thu tarlan a ni bawk.
Dan lova khaw din Tuichawngchhuah ata- nga Tuichawng-a sawn chhuah chhungkuate dinhmun zirchianna hi DLAO PC Zonuntluangi’n kaihruaiin LAD thawktute bakah Rural development, School education, H&FW leh Tuichawng VCP B. Natun Kumar Chakma leh a thawhpuite an nih thu sorkar thuchhuah chuan a tarlang.